हरिनगर । सुनसरीको हरिनगर गाउँपालिकामा प्रदेश १ स्तरीय एथेलेटिक्स प्रतियोगिता शनिवारबाट सुरु भएको छ । हरिनगर माध्यमिक विद्यालय हरिनगराको खेल मैदान प्रदेश १ स्तरीय एथलेटिक्स प्रतियोगिता शनिवारबाट सुरु भएको हो ।
हरिनगर गाउँपालिकाको आयोजनामा प्रदेश १ स्तरीय एथलेटिक्स प्रतियोगिता तीन दिनसम्म संचालन हुनेछ । प्रदेश १ स्तरीय एथलेटिक्स प्रतियोगिताको हरिनगर, देवानगंज र कोसी गाउँपालिकाका अध्यक्षहरु क्रमशः गफार अन्सारी, लाली प्रसाद मेहता र ऐयुव अन्सारीले संयुक्त रुपमा उद्घाटन गरी संचालन भएको हो ।
प्रदेश १ स्तरीय एथलेटिक्स प्रतियोगितामा ११ जिल्लाको सहभागिता रहेको छ । सो ११ जिल्लाका बालबालिकाहरु प्रदेश १ स्तरीय एथलेटिक्स प्रतियोगितामा सहभागी भई तीन दिनसम्म सहभागिता रहने समेत आयोजकले जनाएको छ ।
हरिनगर गाउँपालिकाले बिभिन्न समयखण्डमा खेलकुद संचालन गर्दै आइरहेको बेला सुनसरीको दक्षिणवर्ती क्षेत्रको हरिनगर गाउँपालिकालाई खेलकुदको मार्फतबाट चिनाउने प्रयास स्वरुप प्रदेश १ स्तरीय एथलेटिक्स प्रतियोगिता सुरु गरिएको हरिनगर गाउँपालिकाका अध्यक्ष गफार अन्सारीले बताएका छन् ।
खेलकुदको माफर्तबाट प्रदेश १ सँगै मुलुकभर पालिकाको पहिचानलाई कायम गर्नका लागि मदत पुग्ने र बालबालिकाहरुको सर्वाङ्गिण विकासका लागि तीन दिने प्रदेश १ स्तरीय एथलेटिक्स प्रतियोगिता सुरु गरिएको हरिनगरका अध्यक्ष अन्सारीले बताए ।
त्यसैगरी कोसी गाउँपालिकाका अध्यक्ष ऐयुव अन्सारीले हरिनगर गाउँपालिकाले विकाससँगै खेलकुदको क्षेत्रमा समेत पहिचान स्थापित गर्न सफल भएको बताएका छन् । प्रदेश १ स्तरीय एथलेटिक्स प्रतियोगिता उद्घाटन कार्यक्रमलाई सम्वोधन गर्दै कोसीका अध्यक्ष अन्सारीले खेलकुद प्रतियोगिताले बालबालिकाहरुमा रहेका प्रतिभा प्रस्फुटन गर्न मदत गर्ने र प्रतिस्पर्धाको माध्यमबाट खेल जगतमा उच्च स्थान ओगट्ने भएकाले प्रतियोगितामा सहभागि भएका बालबालिकाहरुलाई जितको अग्रिम शुभकामना व्यक्त गरे ।
प्रदेश १ स्तरीय एथलेटिक्स प्रतियोगितामा सुनसरी, मोरङ्ग, झापा, इलाम, संखुवासभा, ओखलढुंगा, उदयपुर, सोलुखुम्बु, खोटाङ्ग, भोजपुर र धनकुटा जिल्लाका बालबालिकाहरु सहभागिता रहेको हरिनगर गाउँपालिकाका शिक्षा शाखाका अजित कुमार मल्लिकले जानकारी दिएका छन् । स्थानीय खेलाडी उत्पादन गरी राष्ट्रिय स्तरका खेलाडी अथवा खेलकुदमा सहभागि गराउने उद्देश्यले आयोजना गरिएको र प्रदेश स्तरीय खेलकुद नभएको अवस्थामा हरिनगर गाउँपालिकाले सो क्षेत्रमा तीन दिने एथलेटिक्स प्रतियोगिता संचालन गरिएको उनले बताए ।
शनिवार पुरुष र महिलातर्फ १०० मिटर, १५०० मि. दौड, लङ्ग जम्प हिट एण्ड फाइनल पुरुष् र महिला, र रिले पुरुष र महिलातर्फ लगायतको खेल संचालन भएको आयोजकले जनाएको छ । सोही दिन अर्को राउण्डमा पुरुष र महिलातर्फ फाइनलमा १०० मि.दौड, सट पुट पुरुष र महिला हिट एण्ड फाइनल र रिले पुरुष र महिलाको फाइनल खेल भएको छ ।
प्रदेश १ स्तरीय एथलेटिक्स प्रतियोगिताको उद्घाटन सत्रमा हरिनगर गाउँपालिकाकी उपाध्यक्ष रिमझिम कुमारी भगत, प्रमुख प्रशासकीय अधिकृत तुलराज थापा, हरिनगर गाउँपालिकाका वडा नम्बर–१ का वडाध्यक्ष लतिफ अन्सारी, ४ का वडाध्यक्ष सुदीलाल मेहता, ६ नम्बरका वडाध्यक्ष इसराईल अन्सारी र नेपाली कांग्रेस सुनसरी क्षेत्र नम्बर ४ प्रदेश(ख) का उपसभापति शिवहरी श्रेष्ठको सहभागिता रहेको थियो ।
