इनरुवा । सुनसरीमा सी लिड्स परियोजनाको तालिम लिएका महिला सदस्यहरुले विभिन्न पार्टीलाई ज्ञापन पत्र बुझाएका छन् । इनरुवामा शी लिड्स महिला नेतृत्व परियोजना अन्तर्गत दलित महिला केन्द्रद्वारा महिला जनप्रतिनिधिहरुलाई क्षमता विकास तालिम दिएकाले महिला सदस्यहरुले वडा अध्यक्ष,मेयर तथा उपमेयर बनाउनुपर्ने माग सहितको १० बुँदे ज्ञापन पत्र बुझाएका हुन ।
नेपाली कांग्रेस इनरुवा नगर सभापति राजन मेहता र नेकपा एमाले नगर अध्यक्ष प्रेम पौडेललाई महिला सदस्यहरुले १० बुँदे माग सहित ज्ञापन पत्र बुझाएका हुन् । स्थानीय तह २०७४ को निर्वाचनमा नेपाली कांग्रेसबाट टिकट पाएर निर्वाचित भएका महिला सदस्यहरु र नेकपा एमालेबाट टिकट पाएर निर्वाचित महिला सदस्यहरुले आ–आफना पार्टीका नगर अध्यक्ष तथा सभापतिहरुलाई आउँदो बैशाख ३० गते हुने स्थानीय तहको निर्वाचनमा महिला सदस्यहरुको सिकाई, भोगाई र अनुभवलाई उच्च मुल्यांकन गरी नेतृत्व गर्ने पदमा टिकट उपलब्ध गराउनुपर्नेमा जोड दिएका थिए ।
त्यसैगरी महिलाहरुको राजनीतिक सहभागीता बढाउन (विशेष गरी नेतृत्व तहमा स्थापितगर्न)को लागि यहाँको दलबाट विशेष पहल गरिनुपर्ने, निर्वाचित भएका महिलाको राजनीतिक क्षमता विकासको लागि सम्वन्धित पार्टीद्धारा विभिन्न खालका क्षमता विकास र मुलप्रवाहीकरण कार्यक्रम ल्याइनुपर्ने, लैङ्गिक आधारमा महिला जनप्रतिनिधिमाथि हुने हिंसा÷विभेद अविलम्ब वन्दगरिनुपर्ने, साथै आगामी निर्वाचनमा सहभागीहुँदा महिला उमेदवारमाथि कुनैपनि किसिमको जातीयभेदभाव नहुने कुरा सुनिश्चित गरिनुपर्ने, निर्वाचित महिलाको आर्थिक विकासको लागि स्थानीयतहबाट विशेष कार्यक्रम ल्याइनुपर्ने माग अघि सारेका छन् ।
त्यसतै राज्यका तीनओटै तहको समन्वय र सहकार्यमा निर्वाचित महिलाजनप्रतिनिधिको क्षमता विकासको लागि विशेष कार्यक्रम घोषणा गरी कार्यान्वयन गर्नुपर्ने, महिलामैत्री नीतिनियमको निर्माण तथा परिमार्जन गरी अविलम्ब कार्यान्वयन गर्न पहल, स्थानीय सरकारबाट पर्याप्त मात्रामा बजेट बिनियोजन गराई महिला लक्षित कार्यक्रमको लागू, संविधानले सुनिश्चित गरेको महिलाका हकअधिकार अविलम्ब कार्यान्वयन गर्नुपर्ने माग गरेको सदस्य मनु चापागाईले जानकारी दिईन् ।
दलित महिला केन्द्रका कार्यक्रम संयोजक रामसुन्दर मेहताले निर्वाचित महिला सदस्यहरुलाई क्षमता विकास तालिम दिई आउँदो स्थानीय तहको निर्वाचनमा पाँच वर्षको अनुभवलाई अनुकरण गर्दै वडाध्यक्ष, मेयर र उपमेयर पदमा महिला सहभागितालाई बिशेष जोड दिदै उनीहरुलाई नेतृत्व तहमा पार्टीहरुले मुल्यांकन गरी टिकट उपलब्ध गराउनका लागि महिला सदस्यहरुले १० बुँदे माग सहित ज्ञापन पत्र बुझाएको बताएका छन् ।
