टोमराज मेहता
इनरुवा । भुमिसुधार तथा मालपोत कार्यालय इनरुवामा कार्यालयबाट दिंइदै आएको सम्पूर्ण विद्युतीय सेवा अनिश्चित कालका लागि बन्द भएको छ । शनिबार विद्युत सर्ट भई बन्द भएको मालपोत कार्यालयको विद्युत लाइनका कारण त्यहाँबाट सञ्चालन हुने सम्पूर्ण विद्युतीय सेवा अनिश्चित कालका लागि बन्द भएको हो ।
आइतबार एक सूचना जारी गरी सोबारे जानकारी गराइएको थियो । आइतबार जारी सूचनामा भनिएको छ, ‘यस कार्यालयको वाइरिङ सर्ट भई विद्युत सेवा अबरुद्ध भई कार्यालयबाट प्रवाह हुने सेवा प्रवाहमा कठिनाइ उत्पन्न भएको हुँदा सो समस्या समाधान भई विद्युत सेवा सूचारु नहुन्जेलसम्म यस कार्यालयबाट हुने गरेका नियमित सेवाहरु (आन्तरिक बाहेक) बन्द रहने सम्पूर्ण सेवाग्राहीहरुलाई जानकारी गराइन्छ ।’
इनरुवा मालपोत कार्यालयबाट विद्युतको विषयलाई लिएर जारी गरिएको यो सूचना पहिलो भने होइन । यसअघि पनि धेरै पटक यस किसिमको सूचना जारी गर्दै गर्दा सेवाग्राहीहरु मर्कामा पर्दै आएका छन् । अफिस टाइममा केही बेरका लागि विद्युत आपूर्ति बन्द भएमा त्यसको वैकल्पिक व्यवस्था गर्न सक्ने क्षमता हुँदा हुँदै पनि अहिलेसम्म त्यसतर्फ कुने पहल भएको भने पाइँदैन र त्यसको पिडा सेवाग्राहीले भोग्दै आएका छन् ।
प्रदेश १ कै राजस्व संकलनमा १ नं. इनरुवा मालपोत कार्यालय सम्भवतः देशकै राम्रो राजस्व संकलन गर्ने कार्यालयको रुपमा परिचित छ । दैनिक करिब पाँच सयको हाराहारीमा कारोबार हुने इनरुवा मालपोत कार्यालय राम्रो राजस्व संकलन गर्ने कार्यालयमा गनिन्छ तर यस कार्यालयका हाकिम षड्कुमार पोखरेलको इच्छाशक्तिमा कमि भएर हो वा अन्य कुनै कारणले हो कार्यालय व्यवस्थापन सुधारमा उनको ध्यान अहिलेसम्म पुग्न सकेको पाइँदैन ।
इनरुवा मालपोत कार्यालयमा सोलारको व्यवस्था छ तर त्यसको सही व्यवस्थापन हुन नसक्दा काम लाग्ने अवस्थामा छैन । त्यस्तै इन्भेटरको पनि व्यवस्था छ तर त्यसको अवस्था पनि त्यस्तै छ ।
फाल्गुन महिना सकिंदै गर्दा हावाहुरीको समय सुरु हुँदैछ । यस समयमा अवस्य नै विद्युत आपूर्तिमा केही व्यवधान पुग्छ नै त्यस अवस्थामा इनरुवा मालपोत कार्यालयसँग अहिलेसम्म कुनै विद्युतीय वैकल्पिक व्यवस्था छैन ।
अहिलेलाई त केही दिनमा नयाँ वायरिङ गरी विद्युत आपूर्ति सुचारु होला तर लाइन नभएको अवस्थामा पनि काममा कुनै व्यवधान नपुगोस् भनी जबसम्म वैकल्पिक व्यवस्था गरिंदैन समस्या ज्युँका त्युँ रहने निश्चित छ । तसर्थ मालपोत कार्यालयका प्रमुख पोखरेलमा इच्छाशक्ति जागेर विद्युत आपूर्तिको वैकल्पिक व्यवस्था नगरुन्जेल सेवाग्राहीले दुःख पाइरहने निश्चित छ । यता कार्यालय प्रमुख पौडेलले सोमवारदेखी नियमित कामकाज सूचारु हुने समेत जनाएका छन् ।
