टोमराज मेहता
इनरुवा । सुनसरीको भोक्राहा नरसिंह गाउँपालिकामा नेपाली कांग्रेसको तर्फबाट अध्यक्ष र उपाध्यक्ष पदका उम्मेदवार बिजयी भएका छन् । नेपाली कांग्रेसको तर्फबाट अध्यक्ष पदमा अजमल अख्तर आजाद र उपाध्यक्ष पदमा सुनिता उराँव भारी मतले बिययी भएका हुन् ।
नेपाली कांग्रेसका उम्मेदवार अजमलले ४ हजार ९ सय ९३ मत र उपाध्यक्ष उराँवले ४ हजार २ सय ४६ मत प्राप्त गरी बिजयी भएको निर्वाचन अधिकृतको कार्यालयले जानकारी दिएको छ ।
नेपाली कांग्रेसका उम्मेदवार अजमलका प्रतिद्धन्द्धी नेकपा एमालेको तर्फबाट अध्यक्ष पदका उम्मेदवार महेन्द्र प्रसाद यादवले ३ हजार ६ सय ५५ मत र उपाध्यक्षका उम्मेदवार सविता देवी मेहताले २ हजार ८ सय ७९ मत प्राप्त गरेर पराजित भएका हुन् । अजमलले १ हजार ३ सय ३८ मतले यादवलाई पछि पार्दै जित हात पार्न सफल भएका छन् ।
त्यसैगरी नेपाली कांग्रेसको तर्फबाट पालिकाको उपाध्यक्ष पदका उम्मेदवार सुनिता उराँवकी प्रतिद्धन्द्धी जनता समाजवादी पार्टीको तर्फबाट उपाध्यक्ष पदकी उम्मेदवार पुनम कुमारी मेहताले २ हजार ७ सय ४६ मत प्राप्त गरी पराजित भएका हुन् । उराँवले १ हजार ३ सय ६७ मतले नेकपा एमालेको तर्फबाट उपाध्यक्ष पदकी उम्मेदवार सविता देवी मेहतालाई पछि पार्दै जित हात पार्न सफल भएकी हुन् ।
गत स्थानीय तहको निर्वाचनमा भोक्राहा नरसिंह गाउँपालिकाको अध्यक्ष पदमा महेन्द्र प्रसाद यादव र उपाध्यक्ष पदमा पुनम कुमारी मेहता निर्वाचित भएका थिए । तर यस पटकको स्थानीय तहको निर्वाचनमा भने निर्वतमान अध्यक्ष र उपाध्यक्ष दुवै जना पराजित भएका छन् ।
नेपाली कांग्रेसका उम्मेदवार अजमल अख्तर आजाद गत स्थानीय तहको निर्वाचनमा महेन्द्र प्रसाद यादवसँग पराजित भएका थिए भने यस पटकको स्थानीय तहको निर्वाचनमा अजमल भारी मतले निर्वाचित भएपछि भोक्राहा नरसिंहबासी खुशयाली सटासाट गर्दै बिजयी जुलुस निकालेर पालिका परिक्रमा गरिरहेका छन् ।
नेपाली कांग्रेसले गुमाएको बिरासत पाँच वर्षपछि बल्ल फर्काउन सफल भएका छन् । गत स्थानीय तहको निर्वाचन पछि कांग्रेसका नेता तथा कार्यकर्ताहरुको रहेको मनमुटावलाई चुनावको समय अन्त्य गरी एक ढिक्का भएर कांग्रेसका उम्मेदवारलाई बिजयी बनाउन लागेपछि आज घोषणा भएको नतिजाले पनि कांग्रेस बलियो रहेको सावित गरेको छ । भोक्राहा नरसिंह गाउँपालिकाको अध्यक्ष, उपाध्यक्ष, वडाध्यक्ष र सदस्यहरुलाई भोक्राहा नरसिंहबासीहरुले खुशीले आर्शिवाद सहित बधाई दिने ओइरो लागेका छन् ।
भोक्राहा नरसिंह गाउँपालिका वडा नम्बर–१ मा राप्रपाका लक्ष्मण मेहता, वडा नम्बर–२ मा नेपाली कांग्रेसका आलम अन्सारी, वडा नम्बर–३ मा नेकपा एसका धिरेन्द्र कुमार यादव, वडा नम्बर–४ मा नेपाली कांग्रेसका हारुन अन्सारी, वडा नम्बर–५ मा राप्रपाका हविव मंसुरी, वडा नम्बर–६ मा नेपाली कांग्रेसका सराजुद्धिन अन्सारी, वडा नम्बर–७ मा राप्रपाका बौवालाल यादव र वडा नम्बर– ८ मा नेपाली कांग्रेसका हाजी उसमान मियाँको प्यानल सहित निर्वाचित भएका छन् ।
