टोमराज मेहता
इनरुवा । सुनसरीको हरिनगर गाउँपालिका वडा नम्बर–४ मा जनता समाजवादी पार्टी बिजयी भएको छ । हरिनगर–४ मा जनता समाजवादी पार्टीको तर्फबाट वडाध्यक्ष पदका उम्मेदवार देवनारायण मेहता सहित पुरै प्यानल बिजयी भएको हो ।
हरिनगर–४ नेपाली कांग्रेसको गढ मानिएका वडा हो । गत स्थानीय तहको निर्वाचनमा नेपाली कांग्रेसको तर्फबाट वडाध्यक्ष पदमा सुदीलाल मेहता निर्वाचित भएका थिए । तर यस पटकको स्थानीय तहको निर्वाचनमा नेपाली कांग्रेसको तर्फबाट निवर्तमान वडाध्यक्ष मेहता टिकट पाउने चर्चा भएपनि अन्तिम समयमा आएर वडाध्यक्ष पदको टिकट राजेश कुमार पालले पाएका थिए ।
हरिनगर–४ नेपाली कांग्रेसको लालकिल्ला मानिएको वडामा यस पटकको निर्वाचनमा जनता समाजवादी पार्टीका उम्मेदवारहरुले रेकर्ड तोड्दै जसपाको लालकिल्ला गाड्न सफल भएको हो । गत स्थानीय तहको निर्वाचनमा नेपाली कांग्रेसको तर्फबाट वडाध्यक्ष पदका उम्मेदवार सुदीलाल मेहतासँग तत्कालिन संघीय समाजवादी पार्टीबाट वडाध्यक्ष पदमा देवनारायण मेहता झिनो मतले पराजित भएका थिए ।
बैशाख ३० गते सम्पन्न भएको स्थानीय तहको निर्वाचनमा हरिनगर–४ का वडाबासीहरुले परिवर्तन चाहेकाले आज आएको नतिजाले जसपाका युवा नेता देवनारायण मेहता भारी मतले पुरै प्यानल सहित निर्वाचित भएका छन् ।
कांग्रेसबाट निर्वाचित जनप्रतिनिधिहरुले पाँच वर्षे कार्यकालमा हरिनगर–४ मा विकास लगायतका कामहरु गर्न असफल भएका कारण जनताले उनीहरुलाई रुचाउन सकेनन् । जनताले परिर्वतन चाहेका हुनाले यस पटकको निर्वाचनमा जसपाबाट उम्मेदवार बनेकाहरुलाई भारी मत दिएर उनीहरु निर्वाचित गराएका हुन् ।
कांग्रेसको गढलाई भत्काउन यसपटकको निर्वाचनमा जसपका नेताहरु सफल भएका छन् । हरिनगर–४ को वडाध्यक्ष पदमा देवनारायण मेहताले १ हजार १ सय ९१ मत मत ल्याई निर्वाचित भएका छन् । उनका निकटतम प्रतिद्धन्द्धी स्वतन्त्र उम्मेदवार कैची छापका युवा नेता इरफान अन्सारीले ७ सय ७१ मत ल्याएर पराजित भएका छन् । मेहता ४ सय २० मतान्तरले निर्वाचित भएका छन् ।
त्यसैगरी नेकपा एमालेका उम्मेदवार बीरेन्द्र मेहताले ५ सय ४० मत ल्याई तेस्रो स्थान ओगट्न सफल भएका छन् भने नेपाली कांग्रेसका उम्मेदवार राजेश कुमार पालले ३ सय १३ मत ल्याई चौथो स्थान ओगट्न सफल भएका हुन् ।
त्यसैगरी जनता समाजवादी पार्टीबाट महिला सदस्य रुबी देवी मेहता, दलित महिला सदस्य चन्द्रवति देवी राम, वडा सदस्यहरुमा सुभाष चन्द्र झा र उमेश प्रसाद मेहता भारी मतले पुरै प्यानल निर्वाचित भएको निर्वाचन अधिकृतको कार्यालयले जनाएको छ ।
हरिनगर–४ का नवनिर्वाचित वडाध्यक्ष देवनारायण मेहताले वडालाई नमुना बनाई विकासको लहर ल्याउने प्रतिवद्धता व्यक्त गरेका छन् । गत स्थानीय तहको निर्वाचनमा जनताको भोट लिएका जनप्रतिनिधिहरुले कुनै पनि विकासको नमुना काम नगरेकाले जनताले यस पटकको चुनावमा दण्ड दिएको उनले बताए ।
जनताको सेवामा अहोरात्र खट्ने र हरिनगर–४ को विकास गर्ने प्रमुख जिम्मेवारी आपूmहरुको काँधमा आएकोले पाँच वर्षमा कम बोल्ने र धेरै काम गरेर देखाउने अठोट लिएर जनताको माझमा आएको समेत नवनिर्वाचित वडाध्यक्ष मेहताले टेलिफोनको कुराकानीमा बताए ।
यस निर्वाचनमा मन र मत दुवै दिएका हरिनगर–४ का वडाबासीहरुलाई मेहताले धन्यवाद ज्ञापन गरेका छन् ।
जनताको ऋणि भएकोले जनताको सेवमा २४ सै घण्टा अहोरात्र खटने प्रतिवद्धता सहित निर्वाचनको समयमा गरेको वाचाहरु समयमै पुरा गर्ने मेहताको भनाई छ । हरिनगर–४ मा जम्मा ३ हजार ७ सय ९४ मत खसेको थियो । जसमा १ सय ७२ मत बदर भएको निर्वाचन अधिकृतको कार्यालयले जनाएको छ ।
