टोमराज मेहता
इनरुवा । सुनसरीको इनरुवा नगरपालिकामा नेपाली काँग्रेसको तर्फबाट नगर प्रमुख र उपप्रमुख पदका उम्मेदवार विजयी भएका छन् ।
नेपाली काँग्रेसको तर्फबाट नगर प्रमुख पदमा केदार भण्डारी र उपप्रमुख पदमा विनीता कुमारी मेहता विजयी भएका हुन् ।
नेपाली काँग्रेसको तर्फबाट नगर प्रमुख पदमा केदार भण्डारीले ११ हजार ८ सय २४ मत र उपप्रमुख पदमा विनीता कुमारी मेहताले ११ हजार ४ सय ८० मत प्राप्त गरी विजयी भएको निर्वाचन अधिकृतको कार्यालयले जानकारी दिएको छ ।
नेपाली काँग्रेसको तर्फबाट नगर प्रमुख पदमा विजयी भएका केदार भण्डारीको निकटतम प्रतिद्वन्द्वी नेपाल कम्युनिष्ट पार्टी (एमाले) का सरोज कुमार पोखरेलले ९ हजार ५३ मत प्राप्त गरी पराजित भएका छन् । नवनिर्वाचित नगर प्रमुख भण्डारीले २ हजार ७७१ मतान्तरले बिजयी भएको हो ।
त्यसैगरी नेपाली कांग्रेसको तर्फबाट इनरुवा नगरपालिकाकोा उपप्रमुख पदमा विनीता कुमारी मेहताकी निकटतम प्रतिद्वन्द्वी नेपाल कम्युनिष्ट पार्टी (एमाले) की सहजादी प्रविनले ९ हजार ५ सय ३७ मत प्राप्त गरी उनीसँग पराजित भएकी छिन् ।
उपप्रमुखमा मेहताले १ हजार ९४३ मतान्तरले बिजयी भएकी हुन् । नवनिर्वाचित नगर प्रमुख, उपप्रमुख , वडाध्यक्ष र सदस्यहरुले इनरुवाबासीसँग खुसीयाली साटासाट गर्दै विजयी जुलुस निकालेर इनरुवा नगर परिक्रमा गरेका छन् ।
२०७४ सालको स्थानीय तहको निर्वाचनमा पनि नेपाली कांग्रेसको तर्फबाट इनरुवा नगरपालिकाको नगरप्रमुखमा राजन मेहता र उपप्रमुखमा जमुना गौतम पोखरेल निर्वाचित भएका थिए । यस पटकको निर्वाचनमा निवर्तमान नगर प्रमुख मेहता इनरुवा–२ बाट वडा सदस्यमा निर्वाचित भएका छन् ।
नेपाली कांग्रेसको तर्फबाट इनरुवा नगरपालिका वडा नम्बर–१ को वडाध्यक्षमा प्रमोद पोखरेल, वडा नम्बर–५ मा अनिल पोखरेल, वडा नम्बर–६ सुमन थापा, वडा नम्बर–७ मा हिक्मत सिंह, वडा नम्बर–१० मा डा.खलिल अन्सारी निर्वाचित भएका छन् । यी पाँच वटै वडामा वडाध्यक्ष पदमा निर्वाचित भएका पाँच जना सबै नयाँ अनुहारका हुन् ।
नेपाली कांग्रेसको तर्फबाट इनरुवा नगरपालिकाको नगरप्रमुख र उपप्रमुख निर्वाचित भएका भण्डारी र मेहताले संयुक्त रुपमा इनरुवा नगरबासीलाई माया र मतका लागि हार्दिक अभार तथा धन्यवाद व्यक्त गरेका छन् । उनीहरुले नगरबासीको आगामी दिनमा साथ र सहयोगको समेत अपेक्षा गरेको छन् ।
