टोमराज मेहता
इनरुवा । स्थानीय तहको सम्पन्न निर्वाचनबाट सुनसरी कांग्रेसमय बनेको छ । गत बैशाख ३० गते सम्पन्न भएको स्थानीय तहको निर्वाचनमा सुनसरीका युवाहरुको सक्रिय सहभागितामा सुनसरीको सात वटा स्थानीय तहमा नेपाली कांग्रेसले नेतृत्व गरेको छ ।
सुनसरीमा युवाहरुको भूमिका बारेमा नेपाली कांग्रेस युवा प्रचार नेटर्वक उपसमितिका केन्द्रीय डा. अबुल हुसेन अन्सारी लगायतको टोलीले आज प्रधानमन्त्री शेरबहादुर देउवासँग भेटघाट गरेको छ ।
सुनसरीको स्थानीय तहमा कांग्रेसले जित हासिल गरेको बारेमा जानकारी गराएको छ । नेपाली कांग्रेस युवा प्रचार नेटर्वक उपसमितिले खेलेको भूमिका बारे आज बलुवाटार पुगेर उपसमितिका केन्द्रीय सदस्य अन्सारी नेतृत्वको टोलीले प्रधानमन्त्री देउवालाई जानकारी गराएका हुन् ।
सुनसरीमा नेपाली कांग्रेसको अवस्था बारे जानकारी गराउँदै प्रचार नेटर्वक उपसमितिका केन्द्रीय सदस्य अन्सारीले सुनसरीमा जिल्ला समन्वय समितिको नेतृत्वका बारेमा समेत कुराकानी गरेका छन् । बालुवाटार पुगेर प्रधानमन्त्री देउवासँगको भेटघाटमा केन्द्रीय सदस्य अन्सारीले जिल्ला समन्वय समिति सुनसरीमा कांग्रेसबाट नेतृत्व गर्न सक्षम व्यक्तिलाई जिम्मेवारी सुम्पिनुपर्नेमा जोड दिएका छन् ।
स्थानीय तहको निर्वाचन बारेमा प्रधानमन्त्रीसँग उहाँले समिक्षा गर्दै आउन लागेको प्रदेश र संघीय निर्वाचनमा समेत सुनसरीमा कांग्रेसको जित हासिल गर्नका लागि युवाहरुको सक्रिय भूमिका रहने समेत युवा नेता अन्सारीले प्रतिवद्धता व्यक्त गरेका छन् । स्थानीय तहको निर्वाचनमा देखिएका असन्तुष्ट पक्षहरुलाई समेत आउँदो निर्वाचनमा समेटेर लैजानका लागि युवा प्रचार नेटर्वक उपसमिति लागि पर्ने समेत उनले जानकारी गराएका छन् ।
सुनसरीमा १२ वटा स्थानीय तह मध्ये नेपाली कांग्रेसले ७ वटा नेपाली कांग्रेसले जित हात पार्न सफल भएको समेत उनले प्रधानमन्त्री समक्ष जानकारी गराउँदै जिससको निर्वाचनमा स्वच्छ छवि भएका व्यक्तिलाई जिम्मेवारी दिनका लागि प्रधानमन्त्री समक्ष उनले पहल गरेका छन् ।
जिल्ला समन्वय समिति सुनसरीमा नेतृत्व दिनका लागि गुट–उपगुट नहेरी काम गर्ने जोश जागर भएका र सबैलाई समेटेर लैजानै सक्ने व्यक्तिलाई जिम्मेवारी दिन सके आउँदो प्रदेश र संघीय निर्वाचनमा सुनसरीको चारवटै निर्वाचन क्षेत्रमा नेपाली कांग्रेसको जित सुनिश्चित हुने समेत उनले प्रधानमन्त्री देउवासँगको भेटघाटमा जानकारी गराएका छन् ।
प्रधानमन्त्रि देउवाले काँग्रेसी युवा प्रचार नेटवर्कले स्थानीय निकायको चुनावमा खेलेको भूमिका अति नै सराहनीय रहेको र अगामी संघिय तथा प्रदेश चुनावमा पनि अझ सशक्त भएर लाग्न निर्देशन दिएका छन् ।
सुनसरीको जिम्मेवारी पाएका काँग्रेसी युवा नेटर्वकका केन्द्रिय सदस्य डा.अबुल हुसेन अन्सारी र ताविल अन्सारीले नेपाली काँग्रेसका आँकाक्षी उम्मेदवारहरुलाई प्रचार प्रसार सामग्री , स्थानीय संचार माध्यमबाट नेपाली काँग्रेसको घोषणा पत्र लगायत अधिनायकवादी शक्ति विरुद्ध कडा रुपमा प्रचारवाजी र काँग्रेस जिताऔ अभियानमा शसक्त रुपले भूमिका निर्वाह गरेका थिए ।
प्रधानमन्त्री देउवासँगको भेटघाटमा नेपाली काँग्रेस,युवा प्रचार नेटवर्क उपसमितिका केन्द्रिय सदस्य डा.अबुल हुसेन अन्सारी, पुष्कर जंग शाही, गिता शर्मा र ताविल अन्सारी लगायतको सहभागिता रहेको थियो ।
