केन्द्रीय समितिमा ज्ञानेन्द्र कार्कीले भने- सभापति देउवामाथि हामीले गर्व गर्नुपर्छ

नेपाली कांग्रेसका केन्द्रीय सदस्य ज्ञानेन्द्रबहादुर कार्कीले पार्टी सभापति शेरबहादुर देउवामाथि सबैले गर्व गर्नुपर्ने बताएका छन्।

पार्टी केन्द्रीय कार्यालय सानेपामा बुधबार बसेको केन्द्रीय समिति बैठकमा बोल्दै नेपाल सरकार प्रवक्तासमेत रहेका कार्कीले देउवा सभापति भएकै कारण थोरै सिट हुँदाहुँदै पनि कांग्रेसको नेतृत्वमा सरकार बनेको बताए।

‘हामीले हाम्रो सभापति माथि गर्व गर्नुपर्ने अवस्था छ। थोरै सिट हुँदाहुँदै हामी सरकारमात्र छैनौं, स्थानीय निर्वाचनबाट मुलुकको ठूलो दल बन्न सफल भएका छौं,’ कार्कीले भने,‘केन्द्र, प्रदेश र गाउँगाउँमा आज कांग्रेस छ। गठबन्धनका समस्या हर होलान्, समस्या समाधान गर्दै जानुपर्छ। देशलाई राजनीतिक स्थायित्व दिन गठबन्धनको निरन्तरता जरूरी छ। पार्टीभित्र आन्तरिक एकता कायम गर्नुपर्छ।’

उनले अहिलेको सरकारले सुशासन दिएको दाबीसमेत गरे।

‘हिजो हप्तैपिच्छे करोडौंको भ्रष्टाचार भएको समाचार आउँथे, अहिले देशमा सुशासन कायम भएको छ,’ कार्कीले भने।

स्थानीय तहको परिणामले नेपाली जनताको मनोविज्ञानमा परिवर्तन ल्याएको उनको भनाइ छ।

‘आन्तरिक एकतालाई बलियो बनाएर नेपाली कांग्रेसलाई मुलुकको सबैभन्दा ठूलो र भरोसायोग्य पार्टी बनाउनु पर्नेछ। अर्थतन्त्र कमजोर छ तर ढुक्क हुनुहोस् म दाबी गर्छु नेपाल श्रीलंकाको बाटोमा जाँदैन, हामीलाई पुग्ने स्रोत साधन देशभित्रै विकास गर्न सकिन्छ,’ उनले भने।

यसअघि बैठकमा बोल्दै केन्द्रीय सदस्य प्रकाशमान सिंहले देउवा सरकारले देखिने र सुनिने कुनै काम गर्न नसकेको भन्दै आलोचना गरेका थिए।

बैठकमा केन्द्रीय सदस्यहरूले बोल्ने क्रम जारी छ।

श्राेत: सेताेपाटी अनलाइन