इनरुवा । सुनसरीमा असोज २३ गते आइतवार मनोनयन दर्ता गराएका २ सय १३ जना उम्मेदबारहरु मध्ये आठ जनाले आफ्नो मनोनयन फिर्ता लिएका छन् ।
आगामी मंसिर ४ गते हुने प्रतिनिधिसभा र प्रदेश सभा निर्वाचनका लागि सुनसरीका विभिन्न राजनीतिक दल र स्वतन्त्रबाट उम्मेदबारी दर्ता गराएका मध्ये स्वतन्त्रबाट आठ जनाले मनोनयन फिर्ता लिएको मूख्य निर्वाचन अधिकृतको कार्यालय सुनसरीले जनाएको छ ।
यहाँका चार वटा प्रतिनिधि सभाका लागि ९५ जनाले मनोनयन दर्ता गराएकोमा निर्वाचन क्षेत्र नम्बर ३ बाट कपलेश्वर यादव र आठ वटा प्रदेश सभा सदस्यका लागि १ सय १८ जनाले उम्मेदबारी दर्ता गराएकोमा निर्वाचन क्षेत्र नम्बर १ (क) बाट पासागं डोल्मा गुरुङ्ग, निर्वाचन क्षेत्र नम्बर १ (ख) बाट कमलबहादुर बस्नेत, निर्वाचन क्षेत्र नम्बर २ (क) बाट अनिता बस्नेत र बद्री नारायण चौधरी, निर्वाचन क्षेत्र नम्बर ३ (ख) बाट गोविन्द्र प्रसाद घिमिरे, निर्वाचन क्षेत्र नम्बर ४ (क) बाट सविता यादव र क्षेत्र ४ (ख) बाट दिपक कटुवालले आ–आफ्नो मनोनयन फिर्ता लिएका छन् ।
मनोनयन फिर्ता लिन बुधवार विहान १० बजेदेखी १ बजेसम्म समय दिएकोमा आठ जनाले मनोनयन दर्ता फिर्ता लिएको मूख्य निर्वाचन अधिकृत अर्जुन अधिकारीले जानकारी दिए ।
उम्मेदवारी फिर्ता लिनेहरुमा निर्वाचन क्षेत्र नम्बर ३ बाट स्वतन्त्र भई उम्मेदवार बनेका कपलेश्वर यादव नेपाल विद्यार्थी संघका महामन्त्री हुन् भने सुनसरी निर्वाचन क्षेत्र नम्बर–४ (क) मा स्वतन्त्र उम्मेदवार बनेकी सविता यादव संविधानसभा सदस्य हुन् । यादव जनता समाजवादी पार्टीकी नेतृ समेत हुन् । सुनसरी क्षेत्र नम्बर–२ (क) बाट बद्री नारायण चौधरी नेपाली कांग्रेसका नेता तथा पूर्व प्रधानाध्यापक हुन् ।
संविधान सदस्य यादवले पार्टीभित्र अन्तरघात गरेर आपूmलाई टिकट नदिई पर्शुराम बस्नेतलाई दिएको भन्दै आक्रोस व्यक्त गरेकी थिईन् । तर बुधवार जसपाका नेताहरुले नेकपा एमाले–जसपा गठवन्धनलाई सहयोग गर्ने दवाव सिर्जना गरेपछि नेतृ यादवले उम्मेदवारी फिर्ता लिएको श्रोतले जनाएको छ । जसपाका नेताहरुले आफूसँग बैइमानी गरेको तर्क समेत गरेकी थिईन् ।
