इनरुवा । आगामी मंसिर ४ गते हुन गइरहेको प्रतिनिधिसभा र प्रदेशसभा सदस्य निर्वाचनको लागि बिहीबार लोकतान्त्रिक बाम गठबन्धनको विशाल आमसभा कार्यक्रम सम्पन्न गरेको छ । सुनसरी निर्वाचन क्षेत्र नम्बर ४ मा प्रतिनिधिसभा सदस्य तर्फ लोकतान्त्रिक बाम गठबन्धनको तर्फबाट साझा उम्मेदवारी दिएका वर्तमान सूचना,सञ्चार एवं प्रविधि,न्याय कानुन तथा संसदीय व्यवस्था मन्त्री नेपाली कांग्रेसका केन्द्रिय सदस्य ज्ञानेन्द्रबहादुर कार्कीको प्रमुख आतिथ्य तथा प्रचारप्रसार संयोजक रेवतीरमण दुलालको अध्यक्षतामा सो कार्यक्रम सम्पन्न भएको हो ।
सो कार्यक्रममा नेपाली कांग्रेस,नेकपा माओवादी केन्द्र,नेकपा एकीकृत समाजवादी पार्टीका केन्द्रिय,प्रदेश,जिल्ला,क्षेत्रदेखि स्थानीयस्तरका अगुवा नेताकार्यकर्ताको उपस्थिति रहेको थियो उक्त कार्यक्रममा सुनसरी क्षेत्र नम्बर ४ बाट प्रतिनिधिसभा सदस्य पदका उम्मेदवार मन्त्रीका साथै नेपाली कांग्रेसका केन्द्रिय सदस्य प्रभावशाली नेता शेखर कोइराला,केन्द्रिय सदस्य तथा सुनसरी क्षेत्र नम्बर २ बाट प्रतिनिधिसभा सदस्य पदको लागि उम्मेदवारी दिएका सिताराम मेहता,नेकपा एकीकृत समाजवादी पार्टीका प्रभावशाली नेता महफुज अन्सारी,नेपाली कांग्रेस जिल्ला सभापति केदार भण्डारी,नेपाली कांग्रेस सुनसरी क्षेत्र नम्बर ४ का सभापति ऐयुब अन्सारी,(क) बाट प्रदेशसभा सदस्य पदका उम्मेदवार सदानन्द मण्डल,(ख) बाट उम्मेदवारी दिएका हाजी डाक्टर इसराइल मंसुरी,नेकपा माओवादी केन्द्र सुनसरी जिल्ला अध्यक्ष योगेन्द्र मण्डल (पप्पु),नेपाली कांग्रेसका नेता नन्दन दत्तलगायत विभिन्न स्थानीयदेखि राष्ट्रियस्तर कलाकारहरू लगायतको उपस्थिति रहको थियो ।
चुनावी आमसभामा आफ्नो शक्ति प्रदर्शन गर्दै मंसिर ४ गते सुनसरी निर्वाचन क्षेत्र नम्बर ४ का मतदाता लोकतान्त्रिक बाम गठबन्धनलाई भोट हाल्न उत्साहित भएको प्रमाणित गरिदिएको प्रचारप्रसार संयोजक दुलालले बताए ।
कार्यक्रमलाई सम्बोधन गर्दै मन्त्री कार्कीले सुनसरी क्षेत्र नम्बर ४ का जनतासँग २०७४ सालमा आफूले गरेका प्रतिबद्धताहरुमध्ये ८० प्रतिशत पूरा गरेको बताए । उनले प्रतिनिधिसभा तर्फ आफ्नो र प्रदेशसभातर्फ दुवैजना नेपाली कांग्रेसका उम्मेदवारहरुको जित सुनिश्चित भएको बताए । पुनः आफू निर्वाचित भएको अवस्थामा गरिबी अन्त्य गर्दै बेरोजगारी र भ्रष्टाचार न्यूनीकरण गरी सुशासन कायम गर्ने बताउदै मन्त्री कार्कीले सुनसरी क्षेत्र नम्बर ४ शिक्षा,स्वास्थ्य,सिचाइ,स्वच्छ खानेपानी,सडक,बिजुली लगायतका सम्पूर्ण समस्या समाधान गर्न आफू लागिपरेको बताए ।
मतदाता चेतनशील भइसकेको बताउदै उनले झुठा आश्वासन दिने व्यक्तिलाई नभई विकास गर्ने व्यक्तिलाई मत हाल्ने बताए । आफू थोरै बोल्ने र बोलेको कुरा पूरा गर्ने व्यक्ति भएकोे बारे सुनसरी क्षेत्र नम्बर ४ का मतदाता जानकार रहेको बताए । दुई पटक नेकपा एमालेका अध्यक्ष केपी शर्मा ओलीले संसद विघटन गरेपनि वर्तमान सत्ता गठबन्धनले देशलाई दुर्घटना हुनबाट जोगाएको उनले बताए । देशमा स्थितरता,सुशासन,विकास र समृद्धिको लागि वर्तमान लोकतान्त्रिक बाम गठबन्धनको विकल्प नरहेको मन्त्री कार्कीको भनाइ छ ।
