सुकदेब चौधरी
बुढीगंगा । बुढीगंगा गाउँपालिका अन्तर्गतका रहेका जनप्रतिनिधिहरुलाई स्थानीय स्तरमा हुने कानूनी प्रावधानको जानकारी गराउने उद्देश्यले शनिबार देखि कानूनी सचेतना सम्बन्धि अभिमुखिकरण कार्यक्रम शुरु गरिएको छ ।
बुढीगंगा गाउँपालिकाको आर्थिक सहयोग तथा पहुँच संस्था इटहरीको आयोजनामा गाउँपालिका तथा वडा स्तरबाट प्रवाह हुने सेवामा जनप्रतिनिधिहरुलाई कानूनी व्यवधान सम्बन्धि प्रष्ट भई सेवा प्रवाहलाई अझ प्रभावकारी बनाउनका लागि अभिमूखिकरण गरीएको संस्थाकी अध्यक्ष बिमला सिवाकोटीले जानकारी गराइन ।
कार्यक्रमका प्रमुख अतिथि तथा बुढीगंगा गाउँपालिकाका अध्यक्ष जितनारायण थापा मगरले कार्यक्रमको उदघाटन गर्नु हुदैै आफ्नो कार्यक्षेत्रबाट गर्नु पर्ने कामलाई लिएर कुनै कानूनी समस्या तथा झण्झट आई परेको खण्डमा आफूले कानूनी सचेतना कार्यक्रममा सिकेका जाने बुझेका विषयहरु समस्या निकारण गर्न थप मद्दत मिल्ने बताउनु भयो ।
त्यसैगरी गाउँकालिकाकी उपाध्यक्ष तथा न्यायीक समितिकी संयोजक अमृता कुमारी गच्छदारले कानूनी क्षेत्रमा ज्ञानको अभाव हुनुका साथै आफूले पनि सिक्ने क्रम मै रहेकोेले यस कार्यक्रमबाट सिकेका कुराहरु न्यायीक समितिमा आई पर्ने अप्ठाराहरु सहज बनाउन मदत पुग्ने बताइन ।
सोही कार्यक्रममा पूर्व प्रहरी उपरिक्षक विद्यानन्द माझीले जनप्रतिनिधिहरुलाई समय समयमा कानूनी सचेतना गराउँदा नविनतम न्याय प्रणालीको बारेमा थप कुराको जानकारी हुनुका साथै आफ्नो गाउँ ठाउँमा जनताको समस्याको निराकरण गर्न सहयोग पुग्ने औल्याउनु भयो ।
सो कार्यक्रममा उजुरी शाखाका प्रमुख धनश्याम कोइराला, पूर्व अध्यक्ष बालचन माझी, नरबहादुर बुढाथोकी लगायतले आफ्नो मनतव्य राखेका थिए । उदघाटन सत्रको अध्यक्षता संस्थाकी उपाध्यक्ष तथा दुहबी नगरपालिकाकी पूर्व उपप्रमुख सुनिता दाहाल साहले गर्नु भएको थियो ।
सो दुई दिने कानूनी सचेतना कार्यक्रममा स्थानीय सरका संचालन ऐन २०७४ ले स्थानीय तह संचालन गर्न बनेका कानूनी प्रावधान, न्यायीक समितिले हेर्ने विषय तथा मेलमिलाप गर्न हुने विषय र मेलमिलापबाट समाधान नभएपछि गरिने प्रकृया, दिगो तथा समावेशी स्थानीय विकास, दिगो विकासका १७ लक्ष्यहरु लगायतका बिषयमा सहभागीहरुलाई जानकारी गराइनेछ ।
दिगो विकासमा नेपालको हालको अवस्था स्थानीय स्तरका समस्या मुद्दाहरु तथा प्रो वोनो सेवा, सामाजिक तथा दर्ता शाखामा गरिने सिफारिस प्रणालीको जानकारी, सामाजिक संजालको प्रयोग तथा आई पर्ने समस्या लगायतका विषयहरुमा अधिवक्ता मधुसुदन चौधरी, अधिवक्ता सुकदेब चौधरी, इटहरी उपमहानगरपालिकाका प्रविधि प्रमुख सिताराम न्यौपाने लगायतले सहजीकरण गरी रहनु भएको छ ।
सो कार्यक्रममा गाउँपालिकाको सातवटै वार्डका वडाध्यक्ष, सदस्यहरु, कार्यपालिका सदस्यहरु, न्यायीक समितिका सदस्यहरु गरी ३५ जना जनप्रतिनिधिहरुको सहभागीता रहेको छ ।
