संगम विष्ट
वराहक्षेत्र : वराहक्षेत्र वडा नं. ६ र ९ स्थित श्रीलङ्का टप्पु क्षेत्रमा रहेको ऐलानी जमिन निजी कम्पनीलाई भाडामा दिने पक्षमा नगरपालिका नरहेको बराहक्षेत्र नगरपालिकाका नगर प्रमुख रमेश कार्कीले स्पष्ट पारेका छन् ।
करिब २५ सय बिघा सरकारी र व्यक्तिको जमिन निजी क्षेत्रलाई भाडा दिन नगरपालिकाले स्वीकृति दिएको कुरा गलत भएको समेत नगर प्रमुख कार्कीले बताएका छन् ।
नगर प्रमुख कार्कीले श्रीलङ्का टापुका जनताको स्वास्थ्य, शिक्षा, पर्यटन र कृषिमा काम गर्ने भनी लिएर आएको प्रस्ताव जनताको हित अनुकूल हुने गरी गर्ने मात्र सहमति भएको तर जमिन भाडा दिने कुनै सहमति नभएको बताए ।
वराहक्षेत्र नगरपालिका–६ र ९ टप्पु कोसी कटानको जोखिममा छ । हरेक वर्ष कोसीले जग्गा कटान गर्छ । त्यहाँको ३० प्रतिशत जमिन कोसी कटानभित्र पर्छ। बाँकी वारि पर्छ, जुन सुरक्षित छ । त्यहाँ हरेक व्यक्तिको ५ देखि १० बिघा जमिन छ। उनीहरू खेती गरेर बसेका छन् । त्यहाँ घाँस दाउरा र सबै हिसाबले सहज छ । ऐलानी जग्गा संरक्षण गर्न नगरपालिका आफैँ पनि लागेको छ । अहिले त्यहाँ बस्ती पनि बढेको छ : कार्कीले भने ।
टप्पुको जनसङ्ख्या करिब दुई हजारमाथि छ। त्यहाँका सबै मानिस हाँसीखुुसी बसेका छन् । स्थानीयले हामीलाई यहाँबाट स्थानान्तरण गरिदिनुप¥यो भनेर आग्रह गरे मात्रै स्थानान्तरण गर्न सकिन्छ । नत्र भने अहिलेलाई हामीले वा सरकारको बलले मात्र त्यसो गर्ने अवस्था छैन ।
त्यहाँ निजी क्षेत्रको एउटा कम्पनीले शिक्षा, स्वास्थ्य, कृषि र पर्यटन क्षेत्रमा काम गर्न नगरपालिकासँग सिफारिस मागेको थियो । हामीले त्यसमा काम गर्ने हो भने ठिक छ भनेर सिफारिस दिएका मात्र छौँ । तर सरकारी जग्गा भाडामा दिने अधिकार नगरपालिकासँग हुँदैन, दिने कुरामा हाम्रो पनि सहमति छैन । निजी जग्गाको कुरा मलाई थाह भएन । सरकारी जग्गा लिजमा दिने अधिकार मन्त्रिपरिषद्सँग हुन्छ । नगरपालिकाभित्र श्रीलङ्का टापु पर्ने भएकाले पनि हाम्रो चासो रहेको छ । तर कोही कसैले भाडामा माग्दैमा त्यहाँ बसोबास गर्ने जनताको हित प्रतिकूल काम गर्न हुँदैन र हामी हुन दिँदैनौ उनले भने ।
बराहक्षेत्र नगरपालिकाद्वारा जारी गरिएको प्रेस विज्ञप्ति जस्ताको त्यस्तै ।
