सुनसरी । सुनसरीको भोक्राहा नरसिंह गाउँपालिकामा प्रथम कोशी प्रदेश सभामुख कपको तयारी पूरा भएको छ ।
समाज विकास केन्द्र नेपाल भोक्राहा नरसिंह–४ को आयोजनामा कार्तिक १५ गते देखि २२ गतेसम्म हुने प्रथम कोशी प्रदेश सभामुख कपको सबै तयारी पूरा भएको हो ।
भोक्राहा नरसिंह–४ स्थित जमिआ खेल मैदानमा हुन लागेको प्रथम कोशी प्रदेश सभामुख कपमा ८ वटा स्थानिय टिमको सहभागिता रहने समाज विकास केन्द्र नेपालका अध्यक्ष सेराज हुसेनले आज आयोजित पत्रकार सम्मेलनमा जानकारी दिएका छन् ।
प्रथम कोशी प्रदेश सभामुख कपमा आयोजक समाज विकास केन्द्र सहित इनरुवाको मधेसा क्लव, इनरुवा फुटबल क्लव, इटहरीको मधेली क्लव, शान्ति युवा स्पोर्टिग क्लव, रामधुनीको रामधुनी युवा क्लव, बराहक्षेत्रको राजाबास क्लव, दुहवीको सिमरिया क्लव गरि ८ वटा टिमको सहभागिता रहने आयोजकले जनाएको छ ।
कोशी प्रदेशसभा सदस्य हाजी इस्राईल मन्सुरीले कोशी प्रदेशसभामा अध्यक्षता गर्ने जिम्मेवारी पाएको थियो । सोही कुरालाई स्मरण गर्दै समाज विकास केन्द्र नेपालले युवाहरुको चाहनालाई मध्यनजर गर्दै खेलकुदको मार्फत सर्वाङ्गिण विकासका लागि र स्थानिय खेलाडीहरुलाई उत्पादन, प्रोत्साहन, संरक्षण र जिम्मेवार बनाउने उद्देश्यले प्रदेश सभा सदस्य मन्सुरीको घर पनि भोक्राहा नरसिंह–४ मा नै भएकाले जामिआ खेल मैदानमा कपको आयोजना गरिएको पत्रकार सम्मेलनमा अध्यक्ष हुसेनले जानकारी दिएका छन् ।
कपमा प्रथम हुनेलाई २५ हजार नगदसहित, शिल्ड, मेडल र प्रमाण पत्र तथा द्धितियलाई १५ हजार नगदसहित, शिल्ड, मेडल र प्रमाण पत्र पुरस्कार प्रदान गरिने आयोजकले जनाएको छ ।
प्रथम कोशी प्रदेश सभामुख कपमा भोक्राहा नरसिंह गाउँपालिकासहित आसपास क्षेत्रका पालिकाहरुबाट दश हजार भन्दा बढीको सहभागिता हुने अपेक्षा गरिएको छ ।
कपको शोभा बढाईदिनका दिनका लागि दर्शकहरुमा आयोजक टिमले अनुरोध समेत गरेको छ ।
