टोमराज मेहता
इनरुवा । कोशी प्रदेश प्रहरी अस्पताल सुनसरीलाई इनरुवामा नै राख्नुपर्ने माग राख्दै सुनसरीका क्रियाशिल राजनीतिक दलहरुले प्रधानमन्त्री पुष्पकमल दाहाल प्रचण्डलाई ज्ञापनपत्र बुझाएका छन् ।
सुनसरीको इनरुवा नगरपालिका वडा नम्बर–२ स्थित जिल्ला समन्वय समिति सुनसरी इनरुवाको परिसरमा संचालन रहेको कोशी प्रदेश प्रहरी अस्पताल सुनसरीलाई उद्घाटन र संचालन गर्न ढिलासुस्ती भइरहेकोले इनरुवामै संचालन तथा उद्घाटन गर्नका लागि सुनसरीका राजनीतिक दलहरुले प्रधानमन्त्री प्रचण्डलाई ज्ञापनपत्र बुझाएको हो ।
प्रहरी अस्पताल संचालनका लागि पूर्वाधारका बारेमा प्रधानमन्त्री प्रचण्डलाई जानकारी गराउँदै सुनसरीको १२ वटै स्थानिय पालिकाहरुको आर्थिक सहयोगमा लाखौं रकम खर्च भइसकेको हुदाँ इनरुवाबाट अन्यत्र कोशी प्रदेश प्रहरी अस्पताल नसारीकन यथावत राख्नका लागि अनुरोध गरिएको छ ।
ज्ञापन पत्रमा भनिएको छ, हामी सम्पूर्ण नगरबासी, र सरोकारवालाहरुको लामो अथक प्रयासपछि सम्भव भएको कोशी प्रादेशिक प्रहरी अस्पताल जुनसुकै परिस्थितिमा इनरुवामै रहनुपर्छ भन्ने माग राख्दै सम्माननीय प्रधानमन्त्रीज्यू, समक्ष यो ज्ञापनपत्र बुझाएका छौं । अन्यथा हामी यस क्षेत्रका बासिन्दा आन्दोलन गर्न बाध्य हुनेछौं ।
सुनसरीका २० जना राजनीतिक दलहरुका प्रतिनिधिहरुद्वारा हस्ताक्षरित ज्ञापन पत्र प्रधानमन्त्री प्रचण्डलाई बालुवाटार पुगेर हस्तान्तरण गरेका थिए ।
सुनसरीका टोलिले नेपाली कांग्रेसका सभापति समेत रहेका पूर्व प्रधानमन्त्री शेरबहादुर देउवा, स्वास्थ्य मन्त्री मोहनबहादुर बस्नेतलाई समेत कोशी प्रदेश प्रहरी अस्पताल सुनसरीमा राख्नुपर्ने माग राख्दै ज्ञापनपत्र बुझाएका हुन् ।
सो टोलीमा सुनसरी क्षेत्र नम्बर–४ का प्रतिनिधिसभा ज्ञानेन्द्रबहादुर कार्की, नेपाली कांग्रेसका केन्द्रियद्धोय राजीव कोइराला र राजीव ढुंगाना, संविधानसभा सदस्य तथा पूर्व राज्यमन्त्री सीताराम मेहता, जिल्ला समन्वय समिति सुनसरीका प्रमुख राजन मेहता, नेपाली कांग्रेस सुनसरीका सभापति केदार भण्डारी, नेपाली कांग्रेस सुनसरीका वरिष्ठ नेता संजय श्रेष्ठ, युवा नेता अबुल हुसेन अन्सारी लगायतको टोली प्रधानमन्त्री प्रचण्ड, पूर्व प्रधानमन्त्री देउवा र स्वास्थ्यमन्त्री बस्नेतलाई भेटेर संयुक्त रुपमा ज्ञापन पत्र बुझाएका छन् ।
