विराटनगर । राष्ट्रियसभा सदस्य निर्वाचनका लागि कोशी प्रदेशबाट गठबन्धनका साझा उम्मेदवार कृष्ण प्रसाद सिटौलाले उम्मेदवारी दर्ता गराउनु भएको छ ।
आज विहान विराटनगर स्थित कोशी प्रदेश निर्वाचन अधिकृतको कार्यालयमा उहाँले उमेदवारी दर्ता गराउनु भएको हो । सिटौलाको प्रस्तावकमा प्रदीप सुनुवार र समर्थकमा हिमाल कार्की रहनु भएको नेपाली कांग्रेसका केन्द्रिय सदस्य भिम पराजुलीले वताउनुभयो ।
नेपाली कांग्रेसका नेता कार्यकर्ता सहित सिटौला उम्मेदवारी दर्ता गराउन निर्वाचन कार्यालय पुग्नु भएको थियो ।
यसैगरि नेकपा माओवादीको तर्फवटा चम्पादेवी कार्कीले उमेदवारी दर्ता गराउनु भएको छ । उहाँको प्रस्तावकमा गणेश उप्रती र समर्थकमा रामकुमारी खत्री रहनु भएको छ ।
यसैगरी नेकपा एमालेको तर्फबाट भोजपुरका परशुराम अधिकारी र महिला क्लस्टरमा सुनसरीकी रुक्मिणी कोइरालाले उम्मेद्वारी दर्ता गराउनु भएको छ । अधिकारीको प्रस्तावकमा प्रदेश सांसद सिर्जना राई र समर्थकमा जयप्रकाश चौधरी रहनुभएको छ भने कोइरालाको प्रस्तावकमा रामप्रसाद महतो र समर्थकमा शिला दिक्षीत रहनुभएको हो ।
यसैगरी राष्ट्रिय प्रजातन्त्र पार्टीको तर्फबाट उद्धव पौडेलले उम्मेदवारी दर्ता गराउनुभएको छ । उहाँलेका प्रस्तावकमा भक्ति प्रसाद सिटौला र समर्थकमा रबिन्द्र प्रसाद लिङदेन रहनुभएको छ । निर्वाचन आयोगका अनुसार आज बिहान १० देखि दिउँसो ३ बजेसम्म उम्मेदवारको मनोनयन दर्ता गर्ने कार्यसूची रहेको छ ।
आज दर्ता भएका उम्मेदवारको अन्तिम नामावली पुस २७ गते प्रकाशन गर्ने आयोगको कार्यतालिका छ । यससँगै पुस २८ गते बिहान १० देखि दिउँसो १ बजेसम्म उम्मेदवारले निर्वाचन चिह्न प्राप्त गर्नेछन ।
माघ ११ गते बिहान ९ देखि दिउँसो ३ बजेसम्म मतदान हुनेछ । मतदान सकिएलगत्तै गणना गरिने आयोगले जनाएको छ । राष्ट्रिय सभामा रिक्त १९ पदका लागि निर्वाचन हुन लागेको हो ।
