हरिनगर । सुनसरीको हरिनगर गाउँपालिकामा १४ औं राष्ट्रपति रनिङ्ग शिल्ड तथा विधालय स्तरीय अध्यक्ष कप खेलकुद प्रतियोगिता शुक्रवारबाट सुरु भएको छ ।
हरिनगर गाउँपालिका शिक्षा, युवा तथा खेलकुद शाखा हरिनगराको आयोजनामा १४ औं राष्ट्रपति रनिङ्ग शिल्ड तथा विधालय स्तरीय अध्यक्ष कप खेलकुद प्रतियोगिता हरिनगरा माविको खेलमैदानमा सुरु भएको हो ।
१४ औं राष्ट्रपति रनिङ्ग शिल्ड तथा विधालय स्तरीय अध्यक्ष कप खेलकुद प्रतियोगिताको उद्घाटन गर्नुहुँदै हरिनगर गाउँपालिकाका अध्यक्ष हाजी गफार अन्सारीले हरिनगरको विकाससँगै खेलकुदको क्षेत्रमा पालिकाले ध्यान दिएको बताउनुभयो ।
बालबालिकाको सर्वाङ्गिण विकासका लागि प्रत्येक वर्ष पालिकाले विधालय स्तरीय प्रतियोगिता मार्फत बिभिन्न खेलकुद गर्दै आएको उहाँले बताउनुभयो । अध्यक्ष हाजी अन्सारीले खेलकुदबाट स्थानीय खेलाडी उत्पादन सँगै राष्ट्रिय र अन्र्तराष्ट्रिय क्षेत्रमा पहुँच पुग्ने उद्देश्यले प्रतियोगिता गर्दै आएको बताउनुभयो ।
विद्यालयस्तरमा रहेका प्रतिभालाई छनोट गरी उत्कृष्ट खेलाडीलाई जिल्ला स्तरीय हुँदै प्रदेश र राष्ट्रिय प्रतियोगितामा समावेश गराउने उद्देश्यले राष्ट्रिपति रनिङ शिल्ड तथा विधालय स्तरीय अध्यक्ष कप खेलकुद प्रतियोगिता आयोजना गरिएको हरिनगर गाउँपालिकाकी उपाध्यक्ष रिमझिम कुमारी भगतले जानकारी दिनुभयो ।
हरिनगर गाउँपालिका भरिका धार्मिक, संस्थागत र सामुदायिक गरि ५८ वटा विद्यालयहरुको सहभागिता रहेको हरिनगर गाउँपालिका शिक्षा, युवा तथा खेलकुद शाखाका अजित कुमार मल्लिकले जानकारी दिनुभयो ।
उहाँले राष्ट्रिय र अन्तराष्ट्रिय रुपमा चिनाउने माध्यम खेलकुद भएको हुदाँ विद्यार्थीहरुमा लुकेर रहेको प्रतिभालाई देखाउने अवसर समेत रहेको बताउनुभयो ।
आज पहिलो दिनको ३ हजार मिटर दौडमा छात्रतर्फ बालकृष्ण माविका मकबुल अन्सारी प्रथम, श्री मावि बसन्तपुरका साविर अन्सारी दोस्रो र बालकृष्ण माविका बिवेक कुमार राम तेस्रो हुनुभएको छ । त्यसैगरी छात्रातर्फ श्री मावि बसन्तपुरकी रुकमा उराँव प्रथम, रुबी मेहता दोस्रो र हरिनगरा माविकी सीता मेहता तेस्रो हुनुभएको हो ।
प्रतियोगितामा दौड, रिले दौड, लङ्ग जम्प, शर्टपुट, ज्यावलिन थ्रो, हाई जम्प, ट्रिप्पल जम्प, लगायतका खेल हुनेछ भने प्रतियोगिता आजबाट माघ ८ गते सोमवारसम्म हुने शिक्षा, युवा तथा खेलकुद शाखा हरिनगरले जनाएको छ ।
