इनरुवा । इनरुवा नगरपालिकाको आयोजनामा आप्रवासी कामदारहरुको संजालका लागि दुई दिने क्षमता अभिबृद्धि सम्वन्धी तालिम आजदेखि सुरु भएको छ । इनरुवा नगरपालिकाको सभाहलमा आजदेखि आप्रवासी कामदारहरुको संजालका लागि दुई दिने क्षमता अभिबृद्धि तालिम सुरु भएको हो ।
इनरुवा नगरपालिकाका प्रमुख केदार भण्डारीले तालिमको उद्घाटन गर्नुहुँद वैदेशिक रोजगारी जान चाहने व्यक्तिहरु सीप सिकेर जान आग्रह गर्नुभएको छ । नगर प्रमुख भण्डारीले सामी परियोनाले सुनसरी जिल्लामा नमूना कार्य गर्दै आएको र वैदेशिक रोजगारीमा उत्पन्न भएको समस्यालाई समाधान गर्न लागि परेको बताउनुभयो ।
वर्तमान संविधानले नागरिकलाई कोखदेखि सोखसम्मको अधिकार प्रदत गरेको हुदाँ सुशासन कायम गर्न सबै लाग्नुपर्ने बताउनुभयो । मुलुकमा रोजगारीको अवसर सिर्जना नभएर वैदेशिक रोजगारमा जानेको संख्या बढ्दै गएको हुदाँ नगरपालिकाले रोजगारी सिर्जना गर्न लागेको बताउनुभयो ।
वैदेशिक रोजगारीको शिलशिलामा गरीव तथा अति विपन्न परिवारहरु दिनप्रतिदिन ठगीमा पर्दै गरेको हुदाँ पनि राज्य उदाशिन रहेको उहाँले बताउनुहुँदै ठगीमा पर्न नदिनका लागि इनरुवा नगरपालिकाले तालिम सञ्चालन गरेको जानकारी दिनुभयो । वैदेशिक रोजगारीको शिलशिलामा मृत्यु भएका, घाइते भएका, ठगीमा परेका, बीमा सम्वन्धी समस्या समाधान गर्न सामी परियोजनाले काम गर्दै आएको र कुनै समस्या भए समन्वय तथा सम्र्पक गर्न उहाँले आग्रह गर्नुभयो ।
श्रम स्वीकृति गरेर वैदेशिक रोजगारमा मृत्यु भएका बालबालिकाहरुलाई छात्रवृति प्रदान, शव ल्याउन पहल, बिभिन्न मुद्धामा पहलकदमी भूमिका निर्वाह, विदेशमा अलपत्र परेका व्यक्तिहरुको लागि समन्वय सहकार्य लगायतको सामी परियोजनाले काम गर्दै आएको छ ।
सुरक्षित आप्रवासन सामी कार्यक्रम अन्तर्गत आप्रवासी कामदारहरुको संजालका लागि दुई दिने क्षमता अभिबृद्धि तालिममा सुनसरीको १२ वटै स्थानियतहबाट ४५ जना भन्दाबढीको सहभागिता रहेको सामी कार्यक्रमका कार्यक्रम संयोजक धिरज भट्टराईले जानकारी दिनुभयो ।
दुईदिनसम्म चल्ने तालिममा सामी हेल्भेटासका कार्यक्रम अधिकृत देव नारायण चौधरी र सुशासन संयोजक कमल बहादुर रोकायाले सहजीकरण गरिरहनुभएको छ ।
