सुनसरी । नेपाली कांग्रेस संसदीय दलको आज सिंहदरबार काठमाण्डौंमा बसेको बैठकमा सुनसरी क्षेत्र नम्बर–४ का सांसद ज्ञानेन्द्र बहादुरी कार्कीले सुनसरीको हरिनगर गाउँपालिकामा उत्पन्न भएको विवादका बारेमा आफनो धारणा राख्नुभएको छ ।
सुनसरी निर्वाचन क्षेत्र नम्बर–४ अन्र्तगत हरिनगर गाउँपालिकामा गत चैत २२ गतेदेखि २५ गतेसम्म लगातार दुईं समुहबीच विवाद बढ्दै गएको र साम्य नभएपछि सांसद कार्कीले सोही विषयलाई लिएर नेपाली कांग्रेस संसदीय दलको बैठकमा जोडदारका साथ आफनो धारणा राख्नुभएको हो ।
प्रतिनिधिसभा सदस्य तथा पूर्व मन्त्री कार्कीले आफनो क्षेत्रमा भएको घटनाप्रति दुःख व्यक्त गर्नुहुँदै झडपमा घाइतेहरुको शीघ्र स्वास्थ्य लाभको कामनासँगै उहाँहरुको उपचारको व्यवस्था सरकारले गर्नुपर्नेमा जोड दिनुभयो ।
बहुभाषिक, बहुसांस्कृतिक, बहुधार्मिक, तथा विविधायुक्त समाज भएको मुलुकमा सदियौंदेखि मिलिजुली रहेको समाजमा जातजातिबीचको एकता र धार्मिक सदभाव खलल पुर्याउने र समाजलाई अराजकतातर्फ धकल्ने कार्य नगर्न र नगराउन उहाँले अपिल समेत गर्नुभएको छ ।
सुनसरीको हरिनगर गाउँपालिका–१ मा गत चैत २२ गते भएको विवादका कारण केही दिनदेखि विकसित भएको घटना क्रमका बारेमा सांसद कार्कीले आफनो धारणा राख्नुभएपछि नेपाली कांग्रेस संसदीय दलको बैठकले पारित गरेको छ ।
नेपाली कांग्रेसका सभापति तथा संसदीय दलका नेता शेरबहादुर देउवाको सभापतित्वमा बसेको सो बैठकले पछिल्लो समय सुनसरीका नागरिकहरुको बीचमा झडप हुँदा नागरिक र सुरक्षाकर्मीहरु समेत घाइते भई कफर्यु लगाउने स्थिति निर्माण भएकोका कारण जनजीवन कष्टकर बनेको भन्दै सामाजिक सदभाव, धार्मिक सहिष्णुता र एकता कायम गर्न सबैमा अपिल गरेको छ ।
घटनामा परी घाइते भएका सबैको शीघ्र स्वास्थ्य लाभको कामनाका साथै उपचार गर्न नेपाल सरकारसँग नेपाली कांग्रेस संसदीय दलको बैठकले जोडदार माग गरेको प्रमुख सचेतक रमेश लेखकद्वारा हस्ताक्षरित प्रेस विज्ञप्तिमा उल्लेख गरिएको छ ।
