अजितकुमार झा
इनरुवा । यही असोज ११ र १२ गते आएको बाढीले सुनसरी भोक्राहा नरसिंह गाउँपालिका–३ की ५० बर्षीया परमिला खत्वेको घरमा ५ फिट सम्म पानी जमेको थियो ।
बाढीको पानी घर छिरेपछि बस्नुका साथै खाना बनाउनका लागि समेत समस्या भएको थियो । बाढीले ३ दिन सम्म भोकै बस्नुपरेको खत्वेको भनाई छ । तर पछिल्लो समय वडा कार्यालयले राहत वितरण गर्दा नपाएको उहाँले गुनासो व्यक्त गर्नुभयो ।
बाढीले घरमा भएको अन्नपात, लत्ताकपडा, भाडा वर्तन सबै बगाएर लगेको भएपनि अहिले सम्म राहत नपाएको खत्वेको भनाई रहेको छ । उहाँ जस्तै कुमारी खत्वेको अवस्था समेत उस्तै रहेको थियो । बाढीले उठिबास बनाएका बेलामा वडामा आएको राहतमा समेत बिभेद भएको कुमारी खत्वको भनाई रहेको छ ।
प्रमिला र कुमारी खत्वे भोक्राहा नरसिंह गाउँपालिकाका लागि उदाहरणका पात्र मात्र हुनुहुन्छ । उहाँ जस्तै भोक्राहा नरसिंह गाउँपालिकामा बाढीबाट पीडित भएका बास्तवीक पीडितले अहिले सम्म राहत नपाएको गुनासो गरेका छन् ।
भोक्राहा नरसिंह गाउँपालिकामा बाढीबाट पीडित भएकालाई डब्लु.एफ.पी.ले प्रति परिवार १५ हजारका दरले वितरण गरेको भएपनि बास्तवीक पीडितलाई राहत नदिएको भोक्राहा नरसिंह गाउँपालिका ७ का धिरेन्द्र कामैतले बताउनुभयो ।
बाढीबाट पीडित भएकाको लागि राहत आएको भएपनि पहुच र पावर भएकाले मात्र राहत पाएको कामैतको भनाई रहेको छ ।बाढीले १० कठ्ठा भन्दा बढी धानबाली नष्ट हुनुका साथै घरमा समेत क्षति भएपनि पहुच र पावर नभएका कारणले राहत नपाएको धिरेन्द्रले राससकर्मी समक्ष गुनासो पोख्नुभयो ।
बाढीबाट पीडित नभएकालाई घरमा भएका व्यक्ति पिच्छै राहत दिएको भएपनि वास्तवीक पीडितले राहत नपाएको भोक्राहा नरसिंह गाउँपालिका–७ का चमरु मण्डलले गुनासो गर्नुभयो ।
यसैबीच बाढीबाट पीडित भएकाले राहत नपाएपछि भोक्राहा नरसिंह गाउँपालिका–३ नम्बर वडा कार्यालयमा सोमबार बिरोध प्रदर्शन गरेका छन् ।
राहत वितरणमा विभेद गरेको भन्दै आक्रोसीत स्थानीयवासीले आन्दोलन गरेको स्थानीय जानकी देवी रामले बताउनुभयो । राहतको नाममा भ्रष्टाचार भएको र वास्तविक पिडितलाई नदिई गैर पीडितलाई राहत वितरण गरेको भन्दै आन्दोलन गरेको रामको भनाई रहेको छ ।
सयौंको संख्यामा आन्दोलनमा उत्रेका स्थानीयले वडा कार्यालयमा तालाबन्दी समेत गरेको स्थानीय तराचन मण्डलले बताउनुभयो ।
बाढीबाट पीडित भएकाका लागि आएको राहतमा वडा सदस्यलाई कुनै जानकारी नदिई आफ्नै मनले राहत वितरण गरेको भोक्राहा–३ का वडा सदस्य पनालाल खत्वले बताउनुभयो ।
वडामा आएको राहतको बिषयमा वडाका जनप्रतिनीधिसंग छलफल गरेर वितरण गर्नुपर्नेमा कुनै किसिमको सल्लाह वा निर्णय नगरिकन वडा अध्यक्षले एक्लौटी ढङगले वास्तवीक पीडितलाई नदिई गैर पीडितलाई वितरण गरेको वडा सदस्य खत्वेले राससकर्मी समक्ष प्रतिक्रिया दिनुभयो ।
यता वडा अध्यक्ष धिरेन्द्रकुमार यादवले आन्दोलनमा उत्रेकालाई लाभग्राहीको नाम शुक्रबार सम्ममा उपलब्ध गराउने र वार्ताको माध्यमबाट समाधान गर्ने बताउनुभयो । यता भोक्राहा नरसिंह गाउँपालिकाका अध्यक्ष अजमल अख्तर अजादले राजनीतिक प्रतिसोधका लागि केही बाढी पीडितलाई उचालेको बताउनुभयो ।
राहत वितरण गर्ने बेलामा कुनै–कुनै वडामा १५ हजार रुपैयाँ दिनुपर्नेमा १४ हजार रुपैयाँ मात्र वितरण गरेको गुनासो आफ्नो समक्ष समेत आएको बताउनुहुदै यस बिषयमा छानबिन गर्ने कार्य भइरहेको अध्यक्ष अजादले बताउनुभयो । यता डब्लु.एफ.पी.का नितेश श्रेष्ठले बाढी पीडितका लागि प्रति परिवार १५ हजार रुपैयाँका दरले नै वितरण गरेको बताउनुहुदै कतै कम दिएको पाइए कारवाही गर्ने प्रतिक्रिया दिनुभयो ।
बाढीबाट भोक्राहा नरसिंह गाउँपालिकामा १ हजार २ सय ९३ घर धुरि प्रभावित भएको जिल्ला प्रशासन कार्यालय सुनसरीको तथ्याङकले देखाएको छ ।
