सुकदेब चौधरी
इनरुवा। बाह्र वर्ष अघि झुम्का कारागारबाट दक्षिण साइडको पर्खालको भित्री भागबाट सुरुङ्ग खनि भागेका १२ जना कैदी मध्ये एक जना कैदीलाई सुनसरीको संयुक्त प्रहरी टोलीले पुनः पक्राउ गरी हिजो शुक्रबार सार्वजनिक गरिएको छ ।
गत कार्तिक २२ गते भारतबाट नेपाल छठ मनाउन आउने क्रममा नेपाल भारत सिमा नजिकबाट कोशी गाउँपालिका ८ स्थित पथरचट्टा भन्ने स्थानबाट फरारी कैदी बिनायक कुमार यादवलाई जिल्ला प्रहरी कार्यालय सुनसरी र प्रहरी चौकी कोशी ब्यारेजको संयुक्त टोलीले पक्राउ गरेको थियो ।
प्रहरीले कैदी यादवलाई विगत देखि नै सुक्ष्म रूपमा निगरानी गरि राखे पनि उनी भारतको विहार राज्य सुपोल जिल्ला शिवनगर ग्राम पञ्चायत रानिगंज स्थित वहिनीको घरमा बस्ने गरेको थियो । यस वर्षको छठ पर्व मनाउन नेपाल आउने क्रममा सिमा क्षेत्रबाट प्रहरीले पक्राउ गर्न खोज्दा उनी भाग्न खोजे पछि घुँडामुनि हुने गरी एक राउण्ड फायर गर्दा उनी अत्तिई ढली गएको तथा उनलाई गोली नलागेको, सोही बखत प्रहरीले पक्राउ गरी जिल्ला प्रहरी कार्यालय सुनसरीमा ल्याई राखिएका हुन ।
यादवको बाँकी कैद भुक्तानीको लागी सुनसरी जिल्ला अदालत मार्फत पुनः कारागार पठाउने तयारी भइरहेको सुनसरी प्रहरीका प्रवक्ता राम प्रसाद तिम्सीनाले जानकारी दिनुभयो ।
चन्द्रशेखर भन्ने विनायक कुमार यादव र श्याम भन्ने श्याम कुमार यादवले २०६५ बैशाख १६ गते बेलुका ८ः३० बजे साविक इनरुवा १० बलाहामा साविक प्रकाशपुर ६ का पल बहादुर कार्कीको छोरा बर्ष ३९ को केशव कार्कीलाई गोली प्रहार गरी घाईते बनाएको थियो भने घाइते कार्कीको उपचारको क्रममा वि.पी. कोईराला स्वास्थ्य विज्ञान प्रतिष्ठान, घोपा, धरानमा मृत्यु भएको थियो ।
प्रहरीले यादवलाई पक्राउ गरी कर्तव्य ज्यान मुद्दा र हातहतियार खरखजना मुद्दामा कारवाही हुँदा २०६५ जेठ ८ गते जिल्ला अदालत सुनसरीबाट २० वर्ष ८ महिना १४ दिन कैद सजायको फैसला भई उक्त कैद सजाय झुम्का कारागारमा भुक्तान गरी रहेको थियो ।
त्यसैक्रममा कैदी यादवलाई जिल्ला प्रहरी कार्यालय सप्तरीले गोबरगडा क्षेत्रबाट पक्राउ गरी सिन्धुपाल्चोक कारागारमा कैद भुक्तानको लागि पठाएकोमा २०७२ बैशाख १२ गते त्यहाबाट पनि भागी फरार भएको थियो । उनी विगतमा मधेश मुक्ति टाइगरमा आवद्ध रहेको खुलेको जनाएको छ ।
यादवले कैदी भुक्तान गरी रहेकै अवस्थामा भागी फरार भएको हुनाले अब उनलाई कारागार ऐन, २०१९ (मिति २०७४ को संशोधन समेत) को दफा २४ को उपदफा ३ बमोजिम कैद म्याद ठेकिएको कैदी भागेको हुदाँ पक्राउ परेपछि बाँकी कैदको डेढी बढाई सजाय हुने कानूनी व्यवस्था अनुसार सजाय हुने जनाइएको छ ।
