सुनसरी । कोशी प्रदेशका मुख्यमन्त्री हिक्मतकुमार कार्कीले मंगलबार अबेरसम्ममा मन्त्रीमण्डल पुनर्गठनको तयारी गरेका छन् ।
नेकपा एमाले कोशी प्रदेश संसदीय दलका प्रमुख सचेतक विदुरकुमार लिङ्थेपले मन्त्रीमण्डलमा १० जना मन्त्री हटाउने र नयाँ नियुक्ति गर्ने प्रक्रिया भइसक्ने जानकारी दिए ।
नेकपा एमालेको संसदीय बोर्डको बैठक मंगलबार दिउँसो १ बजेका लागि बोलाइएको लिङ्थेपले जानकारी दिए । बहालवाला एक मन्त्रीले आफूहरु भोलिसम्म (मंगलबार) का लागि मात्रै मन्त्री रहने जानकारीमा आएको बताए ।
नेपाली कांग्रेस संसदीय दलका नेता उद्धव थापाले सोमबार काठमाडौं पुगेर पार्टीका शीर्ष नेताहरुसँग छलफलबाट मन्त्रीको नाम टुंगो लगाएका छन ।
स्रोतका अनुसार यसअघि कांग्रेसबाट खोटाङका भुपेन्द्र राईले सम्हालिरहेको भौतिक पूर्वाधार विकास मन्त्रालयमा ओखलढुंगाका प्रदीपकुमार सुनुवार, सुनसरीका सदानन्द मण्डलले सम्हालेको पर्यटन, वन तथा वातावरण मन्त्रालयमा विराटनगरका भीम पराजुली, खाली रहेको स्वास्थ्य मन्त्रालयमा मोरङका मानबहादुर लिम्बू र ताप्लेजुङका खगेनसिंह हाङ्गामले सम्हालेको उद्योग, कृषि तथा सहकारी मन्त्रालयमा सुनसरीका इस्राइल मन्सुरीलाई पठाउने तयारी भएको छ ।
नेकपा एमालेबाट इलामका रामबहादुर मगरले सम्हालेको आर्थिक मामिला तथा योजना मन्त्रालय तथा सुनसरीका रेवतीरमण भण्डारीले सम्हालेको आन्तरिक मामिला तथा कानुन मन्त्रालयमा धनकुटाका इन्द्रमणि पराजुली र संखुवासभाका विदुरलाई जिम्मेवारी दिने तयारी रहेको स्रोतले जनाएको छ ।
यस्तै खोटाङका पाँचकर्ण राईले सम्हालेको सामाजिक विकास मन्त्रालयमा मोरङका ज्ञानेन्द्र सुवेदी र सुनसरीको रामप्रसाद महतोमध्ये एक जनालाई तथा झापाका एकराज कार्कीले सम्हालेको खानेपानी, सिंचाइ तथा ऊर्जा मन्त्रालयमा झापाकै तिलचन पाठकलाई दिने तयारी भएको एमाले स्रोतले जनाएको छ ।
