इनरुवा । नेपाल कम्युनिस्ट पार्टी (नेकपा) मा विवाद उत्पन्न भएपछि बामदेव गौतमको गुटमा इनरुवाका नेता कालुराम गुरुङ केन्द्रीय सदस्यमा मनोनित हुने भएको छ ।
प्रचण्ड–नेपाल र ओली समूहको गुट विभाजनमा भएपछि बामदेव गौतमको नेतृत्वमा दुई पक्षलाई मेलमिलाप गराउने भूमिका रहने गरी गौतमको गुटले आफ्नै छुट्टै समूह निर्माण गरी देशभर समिति बिस्तार गर्ने भएको छ ।
गौतमका गुटमा इनरुवा नगरपालिका वडा नम्बर ३ का वडाध्यक्ष कालुराम गुरुङ पनि केन्द्रीय सदस्यको लाइनमा रहेको समाचार स्रोतले जनाएको छ । गुरुङले लविङका लागि काठमाडौँ पुगेर गौतम पक्षले आयोजना गरेको भेलामा सहभागी भएको बताइएको छ ।
भेलामा नेकपाका नेता बामदेव गौतमका पक्षधरहरु मात्रै काठमाडौँमा सहभागी भएका थिए । सो भेलाले प्रचण्ड–नेपाल र ओली पक्षधरबाहेकको समूह निर्माण गरी देशभर गौतम पक्षधरहरुले आआफनो कमिटी निर्माण गर्ने तयारी रहेको छ ।
काठमाडौँमा नेताहरुको जमघट भएको बेला कालुराम गुरुङ बामदेव गौतमको लविङमा केन्द्रीय सदस्य बन्न लागेका हुन् । नेकपाका अरु पक्षधरलाई मेलमिलाप गराउने भूमिका खेल्ने गरी छुट्टै पहिचान दिने गरी बामदेव गौतमको पक्षधर समूहले आफ्नो पक्षलाई बलियो बनाउनका लागि नयाँ योजना र भावी रणनीति तय गर्नका लागि नेता तथा कार्यकर्ताहरु काठमाडौँमा जमघट बनाएर बसेको समाचार स्रोतले जानकारी दिएका छन् ।
यस विषयमा नेकपा नेता कालुराम गुरुङले सुनसरी अनलाइनसँग कुराकानी गर्दै आफ्नो विशेष कामले काठमाडौँ आएको बताउँदै भेलामा सहभागी भएको तर आफू कुनै पदमा नरहेको बताएका छन् ।
नेकपामा विवाद उत्पन्न भएपछि नेताहरुसँग भेटघाट र वर्तमान स्थितिबारे छलफल गरेको र पार्टी विवादलाई साम्य बनाउन आफूले पहल गरेको बताएका छन् ।
गुरुङले नेकपाभित्रको विवादलाई मेलमिलापबाट अगाडि बढ्न सुझाव दिएको र गौतम खेमाबाट नै केन्द्रीय सदस्यमा मनोनित नभएको प्रतिक्रिया दिएका छन् ।
यता समाचार स्रोतका अनुसार बामदेव गौतमकोे खेमाबाट कालुराम गुरुङ केन्द्रीय सदस्यमा सिफारिस भइसकेको र घोषणा हुनमात्र बाँकी रहेको छ ।
