इनरुवा । नेपाली कांग्रेसको भातृसंगठन नेपाल तरुण दल नगर कार्यसमिति इनरुवा सुनसरीले इनरुवामा बृहत मोटरसाइकल र्याली निकालेको छ ।
वर्तमान सरकारको बिरुद्धमा नेपाल तरुण दल नगर कार्यसमिति इनरुवा सुनसरीले इनरुवा नगरपालिकाको १० वटै वडामा मोटरसाइकल र्याली प्रदर्शन गर्दै सोमबार हुने बृहत बिरोध प्रदर्शनमा सहभागिताको लागि आह्वान समेत गरेको छ ।
तरुण दलको अगुवाईमा निकालिएको मोटरसाइकल र्यालीमा सयौंको संख्यामा तरुण तथा बिधार्थी, युवाहरुको सहभागिता रहेको थियो ।
सहभागीहरुले अधिनायकवाद सरकार मुर्दावाद, कालाबजारी, भ्रष्टाचार बन्द गर, महिला हिंसा अन्त्य गर,नेता रामचन्द्र पौडेलमाथि अभद्र ब्यवहार गर्नेलाई कार्वाही गर , सरकारको गलत कार्य तत्काल बन्द गर, सुशासन कायम गर लगायतका नाराबाजी गर्दै नगरपरिक्रममा गरेका थिए ।
फोटो : सुनोज निरौला
नगरपरिक्रममा पछि आयोजित कोणसभामा इनरुवा नगरपालिका नगर प्रमुख तथा नेपाली कांग्रेस नगर सभापति राजन मेहताले नेपाली कांग्रेसमाथि हस्तक्षेप र दमन भए त्यसको कडा प्रतिकार गर्ने चेतावनी दिए ।
मेहताले कांग्रेसमाथि वा कांग्रेस नेता कार्यकर्तामाथि औंला उठाए औला काटिदिने चेतावनी दिदैं आफूहरु शान्तिपूर्ण आन्दोलन गर्न तयारी रहेको बताए । सरकार आन्दोलनको दबाबबाट नसचिए जस्तोदसुकै कदम चाल्न बाध्य हुने चेतावनी दिए ।
त्यसैगरी नेपाल तरुण दलका नगरसभापति तथा उद्योग वाणिज्य संघ इनरुवाका सदस्य सुरेन्द्र कुमार साहले आफूहरुको आन्दोलन रहर नभई बाध्यता भएको बताउँदैं नेपाली कांग्रेसको नेता तथा कार्यकर्तामाथि दमन भए त्यसको प्रतिवाद गर्ने उद्धेश्यले मोटरसाइकल र्याली निकालिएको बताए ।
साहले शान्तिपूर्ण आन्दोलनले सरकार सचेत नभए आफू सरकारबिरुद्ध आन्दोलनको स्वरुप परिवर्तन गरी अगाडी बढने समेत बताए ।
र्यालीमा कांग्रेस सुनसरीका उपसभापति संजय श्रेष्ठ, नेपाली कांग्रेसका प्रशिक्षण विभागका सदस्य बीरेन्द्र साह, धीरज भट्टराई , चन्दन यादव, कृष्ण भगत, बहाव अन्सारी, लगायतको सहभागिता रहेको थियो ।
