हरिनगर । सुनसरीको हरिनगर गाउँपालिकामा रहेको बासुकीनाथ मन्दिरमा महाशिवरात्री महोत्सव सम्पन्न भएको छ । प्रत्येक वर्षझै यस वर्ष पनि महाशिवरात्री महोत्सव सम्पन्न भएको हो । हरिनगर–२ स्थित रहेको विशाल मिथलेश्वर शिव मन्दिरबाट हरिनगरको बासुकीनाथ मन्दिरसम्म रथ यात्रा पनि सम्पन्न गरेको छ ।
साविकको रामनगर भुटाहाबाट हरिनगरासम्म रथयात्रामा सहभागी भएका युवाहरु पैदल यात्राबाट हरिनगरको महोत्सवमा सहभागी भएका थिए । विशाल मिथलेश्वर शिव मन्दिरमा कन्याकुमारीहरुले जल अर्पण गरेका थिए । रथयात्रामा सहभागि भएका युवाहरुलाई हरिनगरका युवाहरुले सर्वत र पानी निःशुल्क व्यवस्था गरेर स्वागत गरेका थिए ।
हरिनगरका युवाहरुको सक्रिय सहभागितामा बासुकीनाथ मन्दिरमा एक कार्यक्रमका बीच महोत्सव मनाएको मन्दिरका अध्यक्ष चेतनलाल बोथराले जानकारी दिएका छन् ।
सुनसरीको इनरुवासहित प्रदेश १ भरि महाशिवरात्रि पर्व शिवको विधिपूर्वक पूजा–आराधना गरेर धुमधामका साथ मनाइएको छ । वैदिक सनातन हिन्दू धर्मावलम्बी बिहीबार बिहानैदेखि नदी, कुण्ड र तलाउमा स्नान गरी शिवालयमा गई पूजा–आराधना गरी सो पर्व मनाएका हुन् ।
शिवको विधिपूर्वक पूजा, आराधना, दर्शन गरे सुख शान्ति र मृत्युपछि सद्गति प्राप्त हुने हिन्दू धर्मावलम्बीहरूको विश्वास रहेको छ । हिन्दुहरुको आस्थाको केन्द्र पशुपति नाथमा हिजो भक्तजनहरुको घुइँचो लागेको थियो । यसका साथै प्रदेश १ मा खोटाङको हलेसी महादेव, झापाको अर्जुनधारा र सुनसरीको पिण्डेश्वरीसहित प्रदेशभरिका शिवालयहरुमा भक्तजनहरुको भिँड लागेको छ ।
कोरोना महामारीलाई पनि बेवास्ता गर्दै यी शिवालयहरुमा बालबालिकादेखि वृद्धवृद्धासम्मको भिँड लागेको हो । इनरुवा आसपासका गाउँपालिकामा रहेका विभिन्न शिव मन्दिरमा समेत धुमधामका साथ महा शिवरात्रि मनाइएको छ ।
हरेक वर्ष इनरुवाको बजारमा रहेको शिव मन्दिर निर्माण कार्य भइरहेकाले यस वर्ष त्यहाँ त्यति उत्साह देखिएन । स्नान गरेर शिवको पूजा गरेमा आफूले चाहेको गुरा सिद्ध हुने र मरपछि बैकुण्ठमा बास हुने हिन्दुहरुको विश्वास रहिआएको छ । यी विश्वासका साथ सुनसरीको इटहरीमा रहेका विभिन्न मठ, मन्दिर तथा तलाउमा पनि शिवको पूजा गर्नेको भिड लागेको थियो ।
इटहरीको बूढी गंगाजमुना मुक्तिघाटमा रहेको शिवको मूर्तिमा पूजा गर्नेहरुको विशेष भिड लागेको थियो । यस्तै धरानको पिण्डेश्वरीमा पनि बिहानैदेखि भक्तालुहरु भिड लागेको छ । यसका साथै प्रदेशका अन्य शिव मन्दिरहरुमा विशेष पूजा आराधना गरिएको थियो ।
