इनरुवा । कोरोनाको महामारी नियन्त्रण तथा रोकथामका लागि नेपाल एसबिआई बैंक लिमिटेडले सुनसरी प्रशासनलाई स्वास्थ्य सुरक्षा सामग्री उपलब्ध गराएको छ ।
नेपाल एसबिआई बैंक लिमिटेड इटहरी शाखाले जिल्ला प्रशासन कार्यालय सुनसरी, जिल्ला प्रहरी कार्यालय सुनसरी, सशस्त्र प्रहरी बल नेपाल नं.४ गण हेड क्वाटर सुनसरीलाई स्वास्थ्य सुरक्षा सामग्री उपलब्ध गराएको हो ।
इनरुवाका समाजसेवी रोहित निरौलाको सहजीकरणमा नेपाल एसबिआई बैंक इटहरी शाखाका प्रबन्धक दुर्गा भट्टराईको टोलीले मंगलवार कार्यालयमा पुगेर स्वास्थ्य सुरक्षा सामग्री उपलब्ध गराएका छन् ।
जिल्ला प्रशासन कार्यालय सुनसरीलाई मास्क १ हजार थान, सेनिटाइजर १० लिटर र ग्लोभ्स १ सय थान बैंकले उपलब्ध गराएको छ ।
जिल्ला प्रहरी कार्यालय सुनसरीका प्रहरी उपरीक्षक कमल थापालाई मास्क ६ हजार थान, सेनिटाइजर ५० लिटर र ग्लोभ्स १ हजार ५ सय थान बैंकका शाखा प्रवन्धक भट्टराईले उपलब्ध गराएका छन् ।
त्यसैगरी सशस्त्र प्रहरी बल नेपाल नं.४ गण हेड क्वाटर सुनसरीका सशस्त्र प्रहरी उपरीक्षक माधव प्रसाद पौडेललाई मास्क ४ हजार ५ सय थान, सेनिटाइजर ३० लिटर र ग्लोभ्स १ हजार थान बैंकका शाखा प्रवन्धक भट्टराईले कार्यालय पुगेर उपलब्ध गराएका छन् ।
बैंकका शाखा प्रवन्धक भट्टराईले कोरोनाको महामारीको समयमा फ्रन्ट लाइनमा रहेर सुरक्षाकर्मीहरु काम गर्दै आएकोले कोभिड १९ कोरोनालाई नियन्त्रण तथा रोकथाममा सहयोग पुग्ने उद्धेश्यले स्वास्थ्य सुरक्षा सामग्री उपलब्ध गराएको बताए । संस्थागत उतरदायित्व कार्यक्रम अन्तरगत बैंकले उनीहरुलाई सामग्री उपलब्ध गराएको उनले बताए ।
जिल्ला प्रहरी कार्यालय सुनसरीका प्रमुख कमल थापाले यस्तो बिषम परिस्थितीमा नेपाल एसबिआई बैंकले ठूलो परिमाणमा स्वास्थ्य सुरक्षा सामग्री उपलब्ध गराएकोमा धन्यवाद व्यक्त गरेका छन् ।
यसैगरी सशस्त्र प्रहरी उपरीक्षक माधव प्रसाद पौडेलले कोरोना रोकथाम र नियन्त्रण गर्नका लागि स्वास्थ्य सुरक्षा सामग्री उपलब्ध गराएकोमा बैंकका प्रबन्धक दुर्गा भट्टराईलाई धन्यवाद पत्र हस्तान्तरण गरेका थिए ।
इनरुवाका समाजसेवी रोहित निरौलाले यसअघि पनि सुरक्षाकर्मी र संचारकर्मीहरुका लागि बिभिन्न सरोकारवालाहरुसँग समन्वय गरि स्वास्थ्य सुरक्षा सामग्री उपलब्ध गराएका थिए ।
