टोमराज मेहता
इनरुवा । कानुन न्याय तथा संसदीय मामिला मन्त्री ज्ञानेन्द्रबहादुर कार्कीले अगामी दिनमा नेपाली कांग्रेस पार्टीलाई देशकै लोकप्रिय र शक्तिशाली पार्टी बनाउन आवश्यक रहेको बताएका छन् । सुनसरीको कोशी गाउँपालिका–१ लौकहीमा स्वागत तथा सम्मान कार्यक्रमलाई सम्वोधन गर्दै मन्त्री कार्कीले यस्तो बताएका हुन् ।
नेपाली कांग्रेसका केन्द्रीय सदस्य तथा सुनसरी क्षेत्र नम्बर–४ का प्रतिनिधि सभा सदस्य समेत रहेका मन्त्री कार्कीले अगामी दिनमा कांग्रेस पार्टीलाई व्यवस्थित बनाएर सबै जातजाति, धर्म संस्कृतीलाई उचित सम्मान गर्दै अगामी निर्वाचनबाट देशकै शक्तिशाली र ठूलो पार्टी बनाउन आवश्यक रहेको बताए ।
कांग्रेसमा सबैलाई मिलाएर अगाडी बढाउन सकेमात्र कांग्रेस पार्टी प्रभावकारी हुन सक्ने उनले तर्क गर्दै कांग्रेस बहुजातिय, बहुधार्मिक, बहुसांस्कृतिक, बहुभाषिकको पार्टी भएकोले अगामी दिनको निर्वाचनबाट सबैको सहयोगमा शक्तिशाली पार्टी बनाउन जिम्मेवारी आएको समेत मन्त्री कार्कीले बताए ।
स्वागत तथा सम्मान कार्यक्रमका प्रमुख अतिथि समेत रहेका मन्त्री कार्कीले देशकै शक्तिशाली पार्टी बनाएर जनताको विकास गर्ने अभिलाषा पुरा हुने समेत बताए । नेपाली कांग्रेसलाई देशकै ठूलो र शक्तिशाली पार्टी बनाउनका लागि सुनसरी कांग्रेसले उदाहरणीय काम गर्न आवश्यक रहेको मन्त्री कार्कीको भनाई छ ।
सुनसरी क्षेत्र नम्बर–४ बाट प्रतिनिधि सभाको सदस्यमा निर्वाचित भएकोले पहिलो प्राथमिकतामा राखेर विकास लगायतको गतिविधिमा एउटा इट्टा थपेर भएपनि नमुना कार्य गर्ने र अगामी दिनमा पनि जनताको भरोसालाई कायम गर्दै अगाडी बढने प्रतिवद्धता समेत उनले व्यक्त गरे ।
नेपाली कांग्रेसको १४ औं महाधिवेशनमा नेतृत्व चयन गर्नका लागि तेरो र मेरो नगर्ने प्रतिवद्धता सहित सक्षम र योग्य व्यक्तिलाई सहमतिमा नेतृत्व चयन गर्न सबैलाई आग्रह गरे ।
उनले भने, ‘नेपाली कांग्रेस पार्टीको आवश्यकता र चुनौतीलाई सामना गर्ने व्यक्तिलाई नेतृत्वको अवसर दिनुपर्छ ।’ अहिले गलत नेतृत्व दिएर अगामी निर्वाचनको बेला पछुतो गर्नुको साटोे बिचार बिमर्श गरेर सहमितमा नेतृत्व चयन गर्न आवश्यक छ ।
कांग्रेसका थपिएको उत्साहलाई कायम गरेर अघि बढनुपर्ने उनले बताए । कांग्रेसको १४ औं महाधिवेशनबाट उत्पन्न हुने मनमुटावले अगामी स्थानीय निर्वाचनमा प्रभाव पार्ने भएको हुदाँ वडास्तरबाटै मेलमिलाप र सहमतिमा नेतृत्व चयन गरेर कांग्रेसको नाम उच्च राख्न सबैलाई उनले अनुरोध समेत गरे ।
फरक प्रसंगमा मन्त्री कार्कीले चैत महिना सम्म कोभिडको भ्याकसिन सबै नेपालीलाई लगाई सक्ने बताए । वर्तमान प्रधानमन्त्री शेरबहादुर देउवाको नेतृत्व सरकारले सबै नेपालीहरुलाई कोभिड–१९ विरुद्धको भ्याक्सीन चैत महिनासम्ममा लगाई सक्ने समेत उनले बताए ।
नेपाली कांग्रेस सुनसरीका सभापति एवं प्रदेश–१ का संसदीय दलका नेता राजीव कोइरालाले कांग्रेसको १४ औं महाधिवेशनको वडा अधिवेशनमा सुनसरीमा ८० वडामा सहमित र बाँकी रहेको वडामा निर्वाचन प्रक्रियाबाट नेतृत्व चयन भएको बताए । पालिका, नगर, प्रदेश, संघीय र जिल्लाको अधिवेशनमा सहमतिमै नेतृत्व चयन गर्न आवश्यक रहेको उनले बताए । स्वागत तथा सम्मान कार्यक्रमका विशिष्ट अतिथि समेत रहेका कोइरालाले सबै तहमा नेतृत्व चयन गर्नका लागि सबैजना एकजुट भएर महाधिवेशन सम्पन्न गनै सबै दायित्व भएको उनले बताए । कांग्रेस सुनसरीको दुई कार्यकाल सफल नेतत्व भूमिका निर्वाह गरेका कोइरालाले भने, अब डेट एकस्पायर भएको छु ।
अगामी नेतृत्व गर्ने व्यक्तिहरुले डेट एक्स्पायरको कुरा कसलै सुन्ने भन्ने प्रश्न पनि उनले गरेका थिए । आउँदो असोज ९ गते हुने पालिका अधिवेशनमा आफनो सकारात्मक भूमिका रहने समेत उनले प्रतिवद्धता व्यक्त गरे ।
इनरुवा नगरपालिकाका नगरप्रमुख राजन मेहताले जिल्लाका नेताहरुले अधिवेशनमा देखिएको समस्यालाई समाधान गर्न भूमिका निर्वाह गर्न आवश्यक रहेको बताएका छन् । कोशी गाउँपालिकामा आयोजित स्वागत तथा सम्मान कार्यक्रमलाई सम्वोधन गर्दै नगरप्रमुख मेहताले अगामी पालिकाको अधिवेशन लगायतमा सहमतिको प्रयास नगरे स्थानीय तहको निर्वाचनमा समस्या हुनेलाई मध्यनजर गर्दैै अहिलेदेखी नै कसरत सुरु गर्ने बताए ।
सो अवसरमा ६ सय उनान्सत्तरीजना क्षेत्रीय प्रतिनिधि र ३२ जना वडा सभापति समेत गरी जम्मा सात सय १ जना प्रतिनिधिहरुलाई मन्त्री कार्कीले सम्मान गरेका थिए । उनीहरुलाई दोसल्ला ओढाएर सम्मानित गरिएको थियो ।
उक्त कार्यक्रम कोशी गाउँपालिकाका अध्यक्ष एवं क्षेत्र नं. ४ का सभापति ऐयुव अन्सारकिो अध्यक्षतामा सम्पन्न भएको थियो । कार्यक्रम क्षेत्र नं. ४ का क्षेत्रीय सचिव राजेन्द्र प्रसाद मेहता र हजरत हुसैनले उद्घोषण एवं व्यवस्थापनको जिम्मेवार िसम्हालेका थिए ।
