टोमराज मेहता
इनरुवा । नेपाली कांग्रेसको १४ औं महाधिवेशन अन्र्तगत आईतवार हुने जिल्ला अधिवेशनका लागि शनिबार मनोनयन दर्ता भएको छ । नेपाली कांग्रेस सुनसरीका सभापति पदका लागि संजय श्रेष्ठ र केदार भण्डारीबीच आज प्रतिस्पर्धा हुँदैछ । सभापति पदका उम्मेदवार श्रेष्ठ र भण्डारीका आ–आफना प्यानल सहित शनिवार नेपाली कांग्रेस पार्टी कार्यालय सुनसरीमा मनोनयन दर्ता गरिएको थियो ।
नेपाली कांग्रेस पार्टी कार्यालय सुनसरीमा शनिवार आआफना समुहले उत्साहका साथ नाराबाजी गर्दै मनोनयन दर्ता गराएका छन् । आज हुने निर्वाचनमा संजय श्रेष्ठको प्यानल र केदार भण्डारीको प्यानलबीच कडा प्रतिस्पर्धा हुँदैछ ।
नेपाली कांग्रेस सुनसरीका निवर्तमान सभापति राजीव कोइरालाको नेतृत्वमा उपसभापति पदमा रहेर संजय श्रेष्ठले एक कार्यकाल र दुई कार्यकाल सचिव पदमा रहेका केदार भण्डारीले काम गरिसकेका दुवै अनुभवी व्यक्ति हुन् ।
सभापति पदका उम्मेदवार संजय श्रेष्ठले निवर्तमान सभापति कोइरालाको अनुकरण गरेर संगठन बलियो बनाउने गरी सबैलाई मिलाएर काम गर्ने प्रतिवद्धता व्यक्त गरेका छन् । यसैगरी सभापति पदका उम्मेदवार केदार भण्डारीका अनुसार कोइरालाले गरेका उदाहरणीय कामहरुलाई आत्मसाथ गरेर पार्टीको संगठनलाई मजबुत बनाउने कार्यमा सक्रिय हुने बताएका छन् । सभापति पदका उम्मेदवार केदार भण्डारीका अनुसार सुनसरीका गुट–उपगुटलाई अन्त्य गर्नका लागि बिशेष ध्यान जानेछ ।
नेपाली कांग्रेसको जिल्ला अधिवेशनमा दुई समुहले उत्साहका साथ मनोनयन दर्ता गराएपनि उम्मेदवाहरु हसिलो अनुहारमा देखिएका थिए । कांग्रेस पार्टी कार्यालय इनरुवा सुनसरीमा उम्मेदवाहरुले नाराबाजी गर्दै मनोनयन दर्ता गराएका थिए ।
सुनसरीको वडा, पालिका, प्रदेश र क्षेत्रको अधिवेशन सम्पन्न भएपछि जिल्ला अधिवेशनको निर्वाचन आज हुँदैछ । वडादेखी नै कोइराला–पौडेल र देउवा समुहमा बिभाजित भई कांग्रेसका नेता तथा कार्यकर्ताहरुले आफनो पकड बनाउनका लागि वडादेखी नै मजबुत बनाउँदै आएकाले जिल्ला अधिवेशनमा पनि कोइराला–पौडेल र देउवा समुहको प्रतिस्पर्धा हुँदैछ ।
नेपाली कांग्रेस सुनसरीमा दुई हजार ९ सय २७ मतदाताहरुले आज मतदान गर्ने भएका छन् ।
यसैगरी उपसभापति पदका उम्मेदवारहरु गफार अन्सारी मियाँ, नगेन्द्र चन्द्र राई, पंकज कुमार महतो र महेश दत्त चुनावी मैदानमा छन् । उनीहरुमध्ये दुई जना चुनावी प्रतिस्पर्धाबाट निर्वाचित हुनेछन । यसैगरी सचिव पदका उम्मेदवारहरु प्रमोद कुमार पोखरेल, माधव बहादुर घिसिङ्ग, रन्जेश भट्टराई, रमेश पाल र बिरेन्द्र कुमार साह मध्ये दुई जनाले चुनावी प्रतिस्पर्धाबाट निर्वाचित हुनेछन् ।
यसैगरी सहसचिव पदमा कालुराम चौधरी, गणेश सुब्बा, गिरधारी प्रसाद साह, मनिष कुमार राई, रमेश कटुवाल, सुनिल कुमार साह मध्ये दुई जना निर्वाचित हुनेछन । उनीहरुबीच कडा प्रतिस्पर्धा हुने पक्कापक्की भएको छ ।
सुनसरी क्षेत्र नम्बर–४ मा सम्पन्न भएको क्षेत्रीय अधिवेशनमा देउवा प्यानल सम्पूर्ण पदमा विजयी भएको थियो । त्यसैगरी नेपाली कांग्रेस सुनसरी जिल्ला अधिवेशनमा केदार भण्डारीको प्यानल बिजयी गराउने तयारीमा जुटेको बताइन्छ ।
सुनसरी जिल्ला अधिवेशनमा केदार भण्डारीको प्यानल बिजयी बनाउने तयारीमा नेता तथा कार्यकर्ताहरु लागि परेका छन् । सुनसरी क्षेत्र नम्बर–४ मा कोइराला–पौडेल समुहका उम्मेदवारहरु पराजित भएपछि अहिले उनीहरु देउवा समुहका उम्मेदवारलाई पराजित गराउन सक्रिय भएका छन् ।
यता देउवा समुहबाट सुनसरी कांग्रेसका सभापति पदका उम्मेदवार संजय श्रेष्ठका प्यानललाई बिजयी बनाउन कसरत गरिरहेका छन् भने आज हुने निर्वाचनमा श्रेष्ठको प्यानललाई बिजयी बनाउन नेता तथा कार्यकर्ताहरु लागि परेका छन् ।
सुनसरी कांग्रेसको जिल्ला अधिवेशनमा दुई समुहबीच प्रतिस्पर्धा हुने निश्चित छ । तथापि संजय श्रेष्ठको प्यानल र केदार भण्डारीको प्यानललाई बिजयी गराउन कांग्रेसका नेता आ–आफना समुहमा लागेका छन् ।
