इनरुवा । नेपाली कांग्रेसको १४ औं महाधिवेशनबाट सुनसरीबाट केन्द्रीय सदस्य पदमा निर्वाचित भएका राजीव ढुंगाना र कल्पना चौधरीलाई कांग्रेसका नेता तथा कार्यकर्ताहरुले मंगलवार बिराटनगर एयरपोर्टमा भब्य स्वागतको तयारी गरेका छन् ।
नेपाली कांग्रेसका केन्द्रीय सदस्य पदमा सुनसरीबाट चारजना निर्वाचित भएका छन् । सुनसरी क्षेत्र नम्बर–४ का प्रतिनिधि सभा सदस्य तथा सञ्चार तथा सूचना प्रविधि मन्त्री ज्ञानेन्द्र बहादुर कार्की, नेपाली कांग्रेस सुनसरीका निवर्तमान सभापति एवं प्रदेश–१ का संसदीय दलका नेता राजीव कोइराला, नेपाल विधार्थी संघका केन्द्रीय सभापति राजीव ढुंगाना र सुनसरीकी नेतृ कल्पना चौधरी नेपाली कांग्रेसको केन्द्रीय सदस्य पदमा अत्यधिक मत ल्याएर निर्वाचित भएका थिए ।
नेपाली कांग्रेसको केन्द्रीय सदस्य पदमा निर्वाचित भएपछि पहिलो पटक सुनसरी आएका मन्त्री कार्की र राजीव कोइरालालाई नेपाली कांग्रेसका नेता तथा कार्यकर्ताहरुले सुनसरीमा आइतवार भब्य स्वागत गरिसकेका छन् ।
त्यसैगरी नेपाली कांग्रेसका केन्द्रीय सदस्यमा निर्वाचित भएका राजीव ढुगांना र कल्पना चौधरीलाई मंगलवार बिराटनगर एयरपोर्टमा भब्य स्वागत गर्दै नेपाली कांग्रेस जिल्ला पार्टी कार्यालय इनरुवा सुनसरीमा स्वागत सम्मान गर्ने कार्यक्रम रहेको सुनसरी कांग्रेसले जनाएको छ ।
उत्साह,एकता र रुपान्तरणलाई कायम गर्नका लागि नेपाली कांग्रेसका नेता तथा कार्यकर्ताहरुले सुनसरीबाट केन्द्रीय सदस्यहरुमा निर्वाचित भएका ढुंगाना र चौधरीलाई एयरपोर्ट हुँदै पार्टी कार्यालय इनरुवा सुनसरीमा भब्य स्वागत सम्मान गर्ने भएको छ ।
