इनरुवा । राष्ट्रिय सभाका लागि माघ १२ गते हुने निर्वाचनमा प्रदेश–१ का गठवन्धनबाट तीन जना उम्मेदवार तय भएका छन् । नेपाली कांग्रेस जिल्ला पार्टी कार्यालय इनरुवा सुनसरीमा गठवन्धनका तीन जना उम्मेदवारहरु मत माग्न र आफुहरुलाई जिताउनका लागि सोमवार इनरुवा आइपुगेको थियो ।
नेपाली कांग्रेस जिल्ला पार्टी कार्यालय सुनसरीमा आयोजना गरिएको भेटघाट कार्यक्रम तथा चुनावी अभियानलाई लक्षित गर्दै राष्ट्रिय सभाका लागि प्रदेश–१ बाट तीन जना उम्मेदवाहरुसँगै गठवन्धनका नेताहरुबीच छलफल भएको छ ।
राष्ट्रिय सभाका लागि माघ १२ गते हुने निर्वाचनमा प्रदेश–१ बाट नेपाली कांग्रेसको तर्फबाट गोपाल बस्नेत, नेकपा एकीकृत समाजवादीको तर्फबाट जयन्ती राई र जनता समाजवादी पार्टीको तर्फबाट हेमराज राई उम्मेदवार बनेका हुन् ।
गठवन्धनका तीन जना उम्मेदवारहरुलाई जिताउनका लागि चुनावी अभियानलाई तिब्रता दिएका छन् ।
नेपाली कांग्रेस प्रदेश–१ का सभापति उद्दव थापाले भेटघाट कार्यक्रमलाई सम्वोधन गर्दै माघ १२ गते हुने राष्ट्रिय सभाको निर्वाचनमा गठवन्धनका उम्मेदवारहरुmलाई जिताउन आवश्यक रहेको बताएका छन् ।
सभापति थापाले १४ वटै जिल्लाका संयन्त्रले गठवन्धनका तीन जना उम्मेदवारहरुलाई अत्यधिक मतले जिताउन आवश्यक रहेको बताएका हुन् । गठवन्धनका तीन जना उम्मेदवारहरुलाई जिताउने अभिभारा आएकोले आ–आफनो ठाउँबाट चुनावी अभियानलाई तिब्रता दिई एकजुट भएर लाग्नुपर्ने उनले बताए । उनीहरुलाई जिताउने अभियान अन्तर्गत सुनसरीको इनरुवा आइपुगेको समेत उनको कथन थियो ।
त्यसैगरि नेपाली कांग्रेसका केन्द्रीय सदस्य तथा प्रदेश–१ का संसदीय दलका नेता राजीव कोइरालाले गठवन्धनलाई मजबुत पार्दै मतभारलाई सुरक्षित गर्नुपर्नेमा जोड दिएका थिए । राष्ट्रिय सभाका लागि गठवन्धनबाट १९ वटा सिटमा जिताउने रणनीति तय गरेर आगाडी बढ्नुपर्ने समेत उनले बताए । अन्तिम वर्ष भएकोले गठवन्धनका उम्मेदवारलाई जिताउन आवश्यक रहेको र यस विषयलाई गम्भिरताका साथ लिनुपर्ने उनको कथन थियो ।
त्यसैगरि नेकपा एकीकृत समाजवादीका पोलिट ब्युरो सदस्य महेश रेग्मीले लोकतन्त्र रक्षाका लागि गठवन्धनका उम्मेदवारलाई जिताउनुपर्ने बताए । राष्ट्रिय सभाका लागि माघ १२ गते हुने निर्वाचनमा गठवन्धनबाट तीन जना उम्मेदवार बिजयी भइसकेको अवस्था हुदाँ पनि निर्वाचनसम्म गठवन्धनले सक्रियताका साथ चुनावी अभियानलाई तिव्रता दिनुपर्ने बताए । नेकपा एमालेका नेताहरुले गठवन्धनलाई कमजोर बनाउन षडयन्त्र गरिरहेको बेला पाँच दलिय गठवन्धनका नेताहरुले एकजुट भएर लोकतन्त्र रक्षाका लागि उम्मेदवारहरुलाई जिताउन आवश्यक रहेको उनले बताए ।
त्यसैगरि जनता समाजवादी पार्टीका वरिष्ठ नेता अशोक राईले नेकपा एमालेका नेताहरुले हुरी बतास ल्याउने तयारी गरेको बेला गठवन्धन सक्रिय हुनुपर्ने बताए । नेता राईले नेकपा एमालेसँग बिचार नरहेको र गठवन्धनसँग मात्र बिचारको राजनीति रहेकोले लोभलालचमा नपर्न मतदाताहरुलाई अनुरोध समेत गरेका छन् । माघ १२ गतेसम्म गठवन्धनका नेता तथा मतदाताहरुले उम्मेदवारहरुलाई साथ, सहयोग र समर्थन गरि बिजयी बनाउन सबै लाग्नुपर्ने उनले बताए । अहोरात्र खटेर पाँच दलिय गठवन्धनबाट प्रदेश–१ का तीन जना उम्मेदवारहरुलाई जिताउने जिम्मेवारी आएकोले आ–आफनो ठाउँबाट सहयोग गर्न उनले अनुरोध गरे ।
नेपाली कांग्रेस सुनसरीका सभापति केदार भण्डारीको सभापतित्वमा भेटघाट कार्यक्रम सम्पन्न भएको थियो । नेपाली कांग्रेस सुनसरीका सचिव बीरेन्द्र कुमार साहले कार्यक्रम संचालन गरेका थिए । सामाजिक दुरी कायम गरि सो कार्यक्रम सम्पन्न भएको थियो ।
पाँच दलिय गठवन्धनका केन्द्र, प्रदेश र जिल्लाका नेताहरुको सहभागिता रहेको थियो भने पालिकाहरुको प्रमुख र उपप्रमुखहरुको समेत उपस्थिती रहेको सुनसरी कांग्रेसका सचिव साहले जानकारी दिएका छन् ।
