टोमराज मेहता
इनरुवा । सुनसरीको चारवटै निर्वाचन क्षेत्रमा दुई गठवन्धनबीच कडा प्रतिस्पर्धा हुने भएको छ । असोज २३ गते आइतवार दुई गठवन्धनका उम्मेदवारहरुले मनोनयन दर्ता गरेपछि अहिले उनीहरुबीच कडा प्रतिस्पर्धा हुने पक्का पक्की भएको हो ।
निर्वाचन आयोगको कार्यतालिका अनुसार आज उम्मेदवारी फिर्ता र चुनाव चिन्ह प्रदान गरेसँगै चारवटै निर्वाचन क्षेत्रमा दुई गठवन्धनबीच कडा प्रतिस्पर्धा हुने आकलन सुरु भएको छ । सत्तारुढ गठवन्धन र नेकपा एमाले–जसपा गठवन्धनबाट उम्मेदवारहरुबीच कडा प्रतिस्पर्धा हुने भएको जानकारहरु बताउँछन् ।
सुनसरीको क्षेत्र नम्बर–१ मा सत्तारुढ गठवन्धनबाट नेकपा माओवादी केन्द्रबाट प्रतिनिधिसभा सदस्यका लागि मुक्सामहाङ मेन्याङ्बो उम्मेदवार बनेका छन् भने सुनसरी–१ (क) मा प्रदेशसभा सदस्यका लागि नेपाली कांग्रेसको तर्फबाट उमेश थापा र (ख) मा नेकपा एसबाट रेवतीरमण राई उम्मेदवार बनेका हुन् ।
यसैगरी नेकपा एमाले र जसपाको गठवन्धनको तर्फबाट जनता समाजवादी पार्टीका अशोक राईले प्रतिनिधिसभा सदस्यका लागि उम्मेदवार बनेका छन् भने सुनसरी क्षेत्र नम्बर–१ (क) मा प्रदेशसभा सदस्य पदका लागि नेकपा एमालेको तर्फबाट रमेशकुमार बस्नेत र प्रदेशसभा (ख) मा नेकपा एमालेको तर्फबाट बिजयकुमार राई उम्मेदवार बनेका हुन् ।
यसैगरी सुनसरी क्षेत्र नम्बर–२ मा प्रतिनिधिसभा सदस्यका लागि नेपाली कांग्रेसको तर्फबाट सीताराम महतो(कोइरी) पुनः उम्मेदवार बनेका छन् भने सुनसरी क्षेत्र नम्बर–२ (क) मा प्रदेशसभा सदस्यका लागि नेकपा माओवादी केन्द्रको तर्फबाट द्धारिकलाल चौधरी र (ख) मा नेपाली कांग्रेसको तर्फबाट पुनः राजीव कोइरालाले प्रदेशसभा सदस्यमा उम्मेदवार बनेका हुन् । २०७४ को निर्वाचनमा प्रतिनिधिसभा महतो र प्रदेशसभामा कोइराला विजयी भएका थिए ।
यसैगरी नेकपा एमाले र जनता समाजवादी पार्टीको गठवन्धनबाट सुनसरी क्षेत्र नम्बर–२ मा प्रतिनिधिसभा सदस्य पदमा भीम आचार्य उम्मेदवार बनेका छन् भने सुनसरी–२ (क) मा रेवतीरमण भण्डारी र (ख) मा रामप्रसाद मेहता उम्मेदवार बनेका हुन् ।
यसैगरी सुनसरी क्षेत्र नम्बर–३ मा प्रतिनिधिसभा सदस्यका लागि नेपाली कांग्रेसको तर्फबाट बिजय कुमार गच्छदार उम्मेदवार भएका छन् भने सुनसरी–३ (क) मा नेकपा माओवादी केन्द्रबाट सरस्वती पोखरेल र (ख) मा नेपाली कांग्रेसको तर्फबाट विन्देश्वर यादव उम्मेदवार बनेका हुन् । २०७४ को निर्वाचनमा सुनसरी क्षेत्र नम्बर–३ मा गच्छदार विजयी भएका थिए ।
यसैगरी सुनसरी क्षेत्र नम्बर–३ मा नेकपा एमालेको तर्फबाट भगवती चौधरीले प्रतिनिधिसभा सदस्य पदका लागि उम्मेदवार बनेकी छिन् भने नेकपा एमालेको तर्फबाट सुनसरी–३ (क) मा प्रदेशसभा सदस्य पदका लागि रोहित कार्की र (ख) मा रामदेव यादव उम्मेदवार बनेका हुन् । सुनसरी क्षेत्र नम्बर–३ मा २०७४ को निर्वाचनमा नेपाली कांग्रेसका उम्मेदवार गच्छदारसँग नेकपा एमालेकी उम्मेदवार चौधरी झिनो मतले पराजित भएकी थिईन् ।
यसैगरी सञ्चार तथा सूचना प्रविधि मन्त्री ज्ञानेन्द बहादुर कार्कीले सुनसरी क्षेत्र नम्बर–४ बाट प्रतिनिधिसभा सदस्यका लागि उम्मेदवार बनेका छन् भने सुनसरी क्षेत्र नम्बर–४ (क) मा प्रदेशसभा सदस्य पदका लागि नेपाली कांग्रेसको तर्फबाट सदानन्द मण्डल र सुनसरी क्षेत्र नम्बर–४ (ख) बाट हाजी इस्राइल मंसुरी उम्मेदवार बनेका हुन् । २०७४ सालको निर्वाचनमा कार्की विजयी भएका थिए ।
नेकपा एमाले र जनता समाजवादी पार्टीको गठवन्धनबाट सुनसरी क्षेत्र नम्बर–४ मा जगदिश प्रसाद कुसियैतले प्रतिनिधिसभा सदस्य पदमा उम्मेदवार बनेका छन् भने नेकपा एमाले–जसपाको गठवन्धनबाट सुनसरी–४ (क) मा जसपाबाट पर्शुराम बस्नेत र (ख) मा नेकपा एमालेबाट अब्बास अन्सारी उम्मेदवार बनेका हुन् । २०७४ को निर्वाचनमा सुनसरी क्षेत्र नम्बर–४ (क) बाट कुसियैत प्रदेशसभा सदस्य पदमा विजयी भएका थिए ।
