टोमराज मेहता
इनरुवा । आगामी मंसिर ४ गते हुने निर्वाचनमा प्रतिनिधिसभा सदस्य पदमा सञ्चार तथा सूचना प्रविधि मन्त्री ज्ञानेन्द्र बहादुर कार्कीले सुनसरी निर्वाचन क्षेत्र नम्बर–४ बाट दोश्रो पटक चुनावमा होमिनु भएको छ । सञ्चारमन्त्री कार्की असोज २३ गते सत्तारुढ गठवन्धनमा नेपाली कांग्रेसको तर्फबाट उम्मेदवारी दर्ता गरि चुनावमा होमिनु भएको हो ।
२०७२ सालमा संविधान जारी भएपछि पहिलो पटक २०७४ सालको निर्वाचनमा अर्थमन्त्री भएको बेला सुनसरी क्षेत्र नम्बर–४ बाट बिजयी हुनुभएको थियो । दोश्रो पटक पनि सञ्चारमन्त्री कार्कीले सुनसरी–४ बाटै उम्मेदवारी दर्ता गराउनु भएर चुनावी मैदानमा उत्रिनुभएको छ ।
२०७४ सालको निर्वाचनबाट प्रतिनिधिसभा सदस्य पदमा निर्वाचित भएपछि पुनः दोश्रो पटक पनि सत्तारुढ गठवन्धनमा नेपाली कांग्रेसको तर्फबाट सञ्चारमन्त्री कार्कीले सुनसरी–४ मा प्रतिनिधिसभा सदस्य पदका उम्मेदवार बन्नुभएको छ ।
२०७४ को निर्वाचनमा नेकपा एमालेका उम्मेदवार रमेश श्रेष्ठ कार्कीसँग पराजित हुनुभएको थियो भने यसपटक नेकपा एमाले–जसपा गठवन्धनको तर्फबाट जगदीश प्रसाद कुसियैतले मन्त्री कार्कीसँग प्रतिस्पर्धा गर्न मैदानमा आउनुभएको छ ।
२०७४ को निर्वाचनमा सुनसरी–४ (क) मा एमालेबाट बिजयी हुनुभएका कुसियैत यसपटक प्रतिनिधिसभा सदस्य पदमा उम्मेदवार बन्नुभएको छ । प्रदेश सदस्यमा बिजयी हुनुभएका पूर्व उद्योग,पर्यटन,वन तथा वातावरण मन्त्री कुसियैतले यसपटक सञ्चारमन्त्री कार्कीसँग चुनावी प्रतिस्पर्धा गर्दैछ।
सुनसरी क्षेत्र नम्बर–४ (क) मा प्रदेशसभा सदस्य पदका लागि सत्तारुढ गठवन्धनमा नेपाली कांग्रेसको तर्फबाट सदानन्द मण्डल र सुनसरी क्षेत्र नम्बर–४ (ख) बाट हाजी इस्राइल मंसुरी उम्मेदवार बन्नुभएको छ भने नेकपा एमाले–जनता समाजवादी पार्टीको गठवन्धनबाट सुनसरी–४ (क) मा जसपाबाट पर्शुराम बस्नेत र (ख) मा नेकपा एमालेबाट अब्बास अन्सारी उम्मेदवार बन्नुभएको हो ।
सञ्चारमन्त्री कार्कीको निर्वाचन क्षेत्रमा कोसी गाउँपालिकाका आठवटा वडा, बराहक्षेत्र नगरपालिकाका ६ देखी ११ सम्मका वडा, रामधुनी नगरपालिकाका ४ नम्बर वडा, इनरुवा नगरपालिकाको ३,४ र ८ नम्बर वडा, भोक्राहा नरसिंह गाउँपालिकाका आठवटा वडा र हरिनगर गाउँपालिकाका १,२,४,५,६ र ७ नम्बर वडाहरु पर्दछ । सुनसरी क्षेत्र नम्बर–४ मा ६८ हजार ५०२ पुरुष र ५९ हजार ५६३ गरि एकलाख २८ हजार ६५ मतदाता रहेका छन् ।
