इनरुवा । नेपाली कांग्रेस सुनसरी क्षेत्र नम्बर ४ का सभापति ऐयुब अन्सारीले आउँदो मंसिर २९ गते सरकार विरुद विशाल प्रदर्शन गर्ने बताएका छन् ।
सुनसरी क्षेत्र नम्बर ४ को बुधबार बसेको क्षेत्रीय बैठकबाट मंसिर २९ गते सुनसरीमा सरकारविरुद्ध प्रदर्शन गर्ने निर्णय गरेको सभापति अन्सारीले बताए ।
क्षेत्रीय बैठकले पुस ५ गतेभित्र क्रियाशील सदस्यहरुको नवीकरण गरी क्षेत्र नम्बर ४लाई जिम्मा लगाउने निर्णय गरेको र कोशी गाउँपालिकाको लौकहीमा क्षेत्रीय कार्यालयको उद्घाटनसमेत गरिएको सभापति अन्सारीले बताएका छन् ।
कांग्रेसका वरिष्ठ नेता रामचन्द्र पौडेललाई केही दिनअगाडि जवरजस्ती पक्राउ गरी नियन्त्रणमा लिई सरकारले दमन गरेको भन्दै सुनसरीमा पनि सरकारविरुद्ध प्रदर्शन गर्ने लागिएको उनको तर्क छ ।
कोशी गाउँपालिकाका अध्यक्षसमेत रहेका अन्सारीले सरकारको रवैया गलत रहेकोका कारण नेपाली कांग्रेस मुलुकभर एकैदिन सरकारविरुद्ध प्रदर्शन गर्ने तयारीमा लागेको बताए ।
केपी ओली नेतृत्व सरकारविरुद्ध सुनसरीमा बृहत प्रदर्शन गर्ने, सरकारले गरेको विभेदकारी भूमिकाप्रति आवाज उठाउने र सरकारले दम्भ देखाइरहेको बेला नेपाली कांग्रेस चुप लागेर नबस्ने र कांग्रेसले शक्ति प्रदर्शन गर्ने क्षेत्रीय सभापति अन्सारीले बताए ।
मंसिर २९ गते सरकारविरुद्ध प्रदर्शन गर्ने भएकोले गाउँटोलबाट सहभागी हुन पनि क्षेत्रीय सभापति अन्सारीले अनुरोध गरेका छन् । सुनसरीमा लाखभन्दा बढी जनमानसको सहभागिता रहनेसमेत बताइएको छ ।
सरकारविरुद्ध विरोध प्रदर्शन गर्ने भएको हुँदा मंसिर २९ गते आन्दोलनमा सरिक हुन सबैलाई अनुरोध गर्दै सरकारले देखाएको रवैयाप्रति कांग्रेसले ठूलो शक्ति प्रदर्शन गर्ने निर्णय गरेको उनले बताए ।
सरकारले प्रतिपक्षीलाई हेर्ने दृष्टिकोण फरक भएकाले आन्दोलनबाट नै अगाडि बढ्ने र जनताले एक–एक हिसाब सरकारसँग माग्न तयार रहेको समेत सभापति अन्सारीले बताए । नेपाली कांग्रेसले सडकदेखि सदनसम्म सरकारविरुद्ध आन्दोलन गर्ने उनले चेतावनी दिएका छन् ।
नेपाली कांग्रेस क्षेत्र नम्बर ४ क्षेत्रीय कार्यसमितिको कार्यालयको क्षेत्रीय सभापति ऐयुब अन्सारीले उद्घाटन गरेको युवा नेता नइम अन्सारीले बताएका छन् ।
उद्घाटन कार्यक्रममा महासमिति सदस्य जीवन बिष्ट, नन्द सिग्देल, क्षेत्रीय सचिव राजेन्द्रप्रसाद मेहता, प्रदेश सभा क्षेत्र सभापति हारुन अन्सारी, भोक्राहा नरसिंहका सभापति युवराज दाहाल, कांग्रेस नेता सदानन्द मण्डल, उपेन्द्र कटुवाल, शिवहरि श्रेष्ठ, अनिता यादव, जमुना गौतम पोखरेल, युवा नेता नइम अन्सारीलगायतको सहभागिता रहेको थियो ।
