जारी सिजन निराशाजनक प्रदर्शनको सिकार बन्दै आएको रियल म्याड्रिडका लागि बुधबारको रात भने सम्झनलायक रह्यो। उसका लागि करिम बेन्जमा नायक बन्दा रियल समूह विजेता बन्दै युइएफए च्याम्पियन्स लिगको अन्तिम १६ मा स्थान बनायो।
बुधबार घरेलु मैदानमा भएको खेलमा बोरुसिया मोन्चेनग्लाडबाकलाई २–० ले हराउँदा दुवै गोल बेन्जमाले सम्भव बनाए। समूहको अर्को खेलमा इन्टर मिलान र शाख्तर डोनेस्कले गोलरहित बराबरी गर्दै अंक बाँडेपछि रियल समूह विजेता बन्न सफल भयो। यस समूहबाट रियल शीर्षस्थानमा रहेर नकआउट चरण पुग्दा मोन्चेनग्लाडबाक उपविजेता बन्यो।
रियलले ६ खेलमा १० अंक जोड्दा ग्लाडबाक र शाख्तरको समान ८-८ अंक रह्यो। हेड टु हेडमा पछि परेको शाख्तरले युरोपा लिग खेल्ने छ। ६ अंकसहित पुछारमा रहेको इन्टर मिलानको युरोप यात्रा समाप्त भयो।
रियललाई नकआउट चरणमा पुग्नका लागि जित्दै पर्ने दबाब थियो।जहाँ खेलको नवौं मिनेटमा रियलले बेन्जेमाको गोलमा अग्रता लियो। लुकास भाज्केजको क्रसलाई बेन्जेमाले आकर्षक हेड गर्दै घरेलु टोलीलाई अघि बढाएका थिए।
३२औं मिनेटमा बेन्जेमाले दोस्रो गोल गर्दै टिमको जित सुनिश्चित गरे। पाहुना टोलीले पनि गोलका केही राम्रा अवसर खेर फालेको थियो।
