इनरुवा । इनरुवा नगरपालिकाका नगरप्रमुख राजन मेहताले नेपाल रेडक्रस सोसाइटी इनरुवा उपशाखालाई सहयोग गर्न तयार रहेको बताएका छन् ।
‘सेवा नै धर्म’ हो भन्ने महान उद्देश्यका साथ नेपाल रेडक्रस सोसाइटीलाई आफूबाट हुने सहयोग गर्न तयार रहेको बताएका छन् ।
नेपाल रेडक्रस सोसाइटी इनरुवा उपशाखाको १२ औं वार्षिक साधारणसभालाई सम्बोधन गर्दै प्रमुख अतिथि नगर प्रमुख मेहताले आफ्नो ओहदा, दर्जा र क्षमताले भ्याएसम्म रेडक्रसलाई सहयोग गर्ने प्रतिबद्धता व्यक्त गरेका छन् ।
नगरप्रमुख मेहताले उपशाखालाई ब्लड बैक भवन बनाउनका लागि सहयोग गरेको बताउँदै अगामी दिनमा पनि बिभिन्न परोपकारी संस्थाहरुलाई समेत सहयोग गर्ने प्रतिवद्धता ब्यक्त गरेका छन् ।
ब्लड बैंक सञ्चालन गर्नुभन्दा पहिले इनरुवा अस्पतालको व्यवस्थापनलाई सुधार गर्नुपर्ने उनले बताउँदै अस्पतालमा राजनीतिक बन्द गरी अस्पताल सुधार गर्न आवश्यक रहेकोसमेत बताए ।
अस्पतालको समस्यालाई अन्त्य गरी चाहिने आवश्यक विशेषज्ञ डाक्टरहरुको प्रबन्ध मिलाई ब्लड बैंक सञ्चालनमा ल्याए काम गर्न सजिलो हुने उनले बताए ।
इनरुवामा समस्या समाधान नगरीकन व्यक्तिहरुलाई उकास्ने काम बढी भइरहेकाले यस्ता काम बन्द गरी सुधारतर्फ अग्रसर हुन जरुरी रहेको नगरप्रमुख मेहताको कथन छ ।
आफूले सबैसँग हातेमालो गरेर अगाडि बढिरहेको र अगामी दिनमा पनि निरन्तरता दिँदै समन्वय र सहकार्य गरेर इनरुवाको विकासलाई उचाइसम्म पु¥याउनका लागि भूमिका खेलिरहेको समेत बताए ।
नेपाल रेडक्रस सोसाइटी इनरुवा उपशाखाले नयाँ योजना र भावी रणनीति बनाउन आग्रह गर्दै उनले भने, ‘रेडक्रस संस्था सेवामुखी संस्था हो,’ कसैले पनि राजनीतिक गर्न पाउँदैनन् ।
यो संस्थालाई अनुशासित, मर्यादित बनाई कसैलाई पनि ठेस नपुग्ने गरी कार्य गर्न सबैलाई उनले अनुरोध गर्दै वार्षिक साधारण सभा सफलताको शुभकामना व्यक्त गरेका थिए ।
कार्यक्रममा विशिष्ट अतिथि जिल्लाका प्रमुख जिल्ला अधिकारी फणिन्द्रमणि पोखरेलले ‘आत्मा साक्षी राखी मन वचन र कर्मले सेवा गरौं’ भन्ने नारालाई सीमित नराखी सबै क्षेत्रमा काम गर्न आग्रह गरेका छन् ।
रेडक्रसले राहत मात्रै बाँडेर काम गर्नु भन्ने सोच गलत भएकाले सामाजिक क्षेत्रमा योगदान पु¥याउन सुझाव दिएका थिए ।
रेडक्रस इनरुवाले ब्लड बैक सञ्चालन गर्नुभन्दा अघि ब्लड दाताहरुको ब्लड गुुप्र पहिचान गरी राख्न आवश्यक भएको र ब्लड बैंक सञ्चालनका लागि सम्पूर्ण पूर्वाधारहरु तयार गर्न सफल भएमात्र ब्लड बैंक सञ्चालनमा ल्याए सार्थक हुने उनको तर्क थियो ।
नेपाल रेडक्रस सोसाइटी इनरुवाका उपशाखाका सभापति रामप्रसाद मेहताले ब्लड बैंक भवन निर्मांणका लागि इनरुवा नगरपालिकाबाट सहयोग प्राप्त भएको हुँदा अगामी दिनमा पनि आवश्यक सहयोगको अपेक्षा गरेको बताए ।
१२ औं वार्षिक साधारण सभा समापन मन्तव्य राख्दैं मेहताले आफू सभापतिको जिम्मेवारी पाएपछि धेरै नै परिवर्तन गरेकोसमेत बताए ।
यता नेपाल रेडक्रस सोसाइटी इनरुवा उपशाखाका वीरेन्द्र साह, योगेन्द्रप्रसाद मेहता र नीरा मेहताले साधारणसभाका लागि आफूहरुलाई जानकारीविना नै साधारणसभा गर्नुको कुनै औचित्य नरहेको बताए ।
१२ औं साधारणसभा गर्दा आफूहरुलाई कुनै जानकारी नगराएकाले असन्तुष्टिसमेत व्यक्त गरेका छन् ।
