यहाँ उभिएर हेर्दैछु
पानीले बगाउँदै गरेको मेरो घर
र, स्तब्ध हुन्छ सम्झेर मन
घरभित्रका परिवार ।
यो घरको जग उठाउँदा किचिएका
हजारौं आफन्तका लासहरु,
मेरो आस्थाको धरोहरलाई घचघच्याउँछन
पीडाको चिसोमा कठ्याङ्ग्रीएका अनुयायीहरु
निष्ठाको उज्यालो सूर्य खोज्दैछन।
आत्मियता र सहृदयताका सामिप्यताहरु
महत्वांकाक्षाको भुँमरीमा
निक्लदै, डुब्दै बगीरहेको मेरो घर
र, स्तब्ध हुन्छ सम्झेर मन
घरभित्रका परिवार।
हामिले लेखेका लक्ष्यका दस्तावेजहरु
कोठामा टाँसेका आदर्शका आलेखहरु
लाखौं निसहायको आश्रयस्थल
हल्लाउँदै
भत्काउदै
मिथ्या लालचको आवेशमा
अनिश्चित दिशातर्फ बग्दै गरेको मेरो घर
र, स्तब्ध हुन्छ सम्झेर मन
घरभित्रका परिवार।
सम्झिदैछु….
घर निर्माणमा खपत भएको
मेरो परिश्रम
– पसिना
र, यातनाको इतिहास।
केवल,
मुकदर्शक बनेर नितान्त एक्लै
मेरो आँखाको महासागरभन्दा पनि भयानक
मेरो हृदयको धड्कनभन्दा पनि गतिशील
स्वार्थको बाडिले बगाउँदै गरेको मेरो घर
र, स्तब्ध हुन्छ सम्झेर मन
घरभित्रका परिवार ।।
लेखक : सागर तिमिल्सिना
