इनरुवा । हरिनगर गाउँपालिकाका अध्यक्ष गफार अन्सारी मियाँले हरिनगरा बजारमा महावीर बजंरगवली मन्दिर बनाउन आफूले सहयोग गर्ने बताएका छन्।
हरिनगर गाउँपालिकाका अध्यक्ष अन्सारीले हरिनगर वडा नम्बर–४ को मुख्य बजार क्षेत्रमा नमूना मन्दिर बनाउन कुनै कसर बाँकी नराख्ने र मन्दिर बनाएर बजारको रौनक बढाउन लागेको बताए ।
पालिका अध्यक्षलाई यसअघि मन्दिर भत्काउने आरोप लागेको बेला अहिले पालिका अध्यक्ष अन्सारीले आरोपलाई चिर्नका लागि हरिनगरा बजार क्षेत्रमा नमूना मन्दिर बनाउनमा जोड दिएको बताएका छन् ।
हरिनगरा बजार क्षेत्रमा जनतासँग अध्यक्ष भन्ने कार्यक्रमअन्र्तगत पालिकाका अध्यक्ष अन्सारीले हरिनगरा बजार क्षेत्रका युवा, व्यापारी र बुद्धिजीवीको गुनासो सुन्नका लागि आइपुगेको कार्यक्रममा गुनासो सुन्दै अध्यक्षले महावीर बजंरगबली मन्दिर निर्माण गर्नका लागि आफूले पूर्ण सहयोग गर्ने प्रतिबद्धता व्यक्त गरेका छन् ।
मन्दिर निर्माण भएपछि बजार क्षेत्रको मुहार फेरिने बताउँदै अध्यक्ष अन्सारीले मन्दिर बनाउनका लागि सम्पूर्ण खर्च पालिका र अन्य दातृ निकाससँग समन्वय गरेर आफ्नै कार्यकालमा काम सम्पन्न गरी लागेको आरोपलाई चिर्दै अगाडि बढ्नेसमेत बताए ।
हरिनगर गाउँपालिकाअन्र्तगत हरिनगर–४ लाई पालिकाको सदरमुकाम बनाउने गरी सबै बाटोहरु जोडेर बाटो निर्माण कार्यलाई सम्पन्न गर्न लागेको उनले बताए ।
यस बजार क्षेत्रलाई विकास गर्दै अगाडि बढेको र हरिनगर बजार क्षेत्रलाई मुहार फेर्नका लागि कामहरु धमाधम सम्पन्न हुन लागेकाले केही दिनमा यो नमूना वडाको रुपमा स्थापित हुने जिकिरसमेत गरे ।
पालिकामा जिम्मेवारी सम्हालेको साढे तीन वर्ष पुग्न लाग्दा पहिलो पटक हरिनगराका युवाहरुले विकासका निम्ति आवाज उठाएको अध्यक्ष अन्सारीको भनाइ छ ।
मन्दिर बनाउने कार्यलाई तीव्रता दिन आफूले पालिकाबाट इन्जिनियरलाई परिचालन गरिसकेको र मन्दिर समितिले पनि सम्पूर्ण कागजातहरु पूरा गरी जिम्मा लगाउन पनि उनले आग्रह गरे ।
गाउँपालिकाकी उपाध्यक्ष रिमझिमकुमारी भगतले आफ्नै घर पनि बजार क्षेत्रमा रहेको हुँदा युवाहरुले गरेको गुनासोलाई सम्बोधन गर्न आवश्यक रहेको बताइन् ।
मन्दिर निर्माण भएपछि मन्दिरलाई संरक्षण र सम्बद्र्धन गर्न सबैले एकजुट हुनुपर्नेमा जोड दिइन् । बजार क्षेत्रमा मन्दिर निर्माण भएपछि हिन्दुहरुको धार्मिकस्थलको रुपमा विकास हुने भएको हुँदा समयमै निर्माण कार्य सम्पन्न गरी नमूना मन्दिर बनाउन जोड दिएकी थिइन् ।
यस्तै समाजसेवी देवनारायण मेहता र खेलानन्दलाल देवले समेत मन्दिर निर्माण गर्नुपर्नेमा जोड दिएका थिए । युवाहरुको अथक प्रयासलाई पालिकाले समयमै सम्बोधन गर्नुपर्ने आवश्यक रहेको उनीहरुले बताएका छन् ।
मन्दिर समितिका अध्यक्ष प्रदीपकुमार साहको अध्यक्षतामा सम्पन्न भएको कार्यक्रममा वडाध्यक्ष सुदिलाल मेहता, हरिनगर गाउँपालिका नेपाली कांग्रेसका सभापति शिवहरि श्रेष्ठ, रामचन्द्र राउत, प्रदीप मेहता, सुभाषकुमार देव, मनोज मेहता, दीपककुमार साह, राजेश मालुलगायतको सहभागिता रहेको थियो ।
