इनरुवा । नेपाली कांग्रेसका केन्द्रीय तथा पूर्व अर्थमन्त्री ज्ञानेन्द्रबहादुर कार्कीले संसद् विघटन अलोकतान्त्रिक कदम रहेको बताउँदै अदालतको निर्णयपछि आफनो पार्टीले थप रणनीति सहितको खाका तयार पार्ने बताएका छन् ।
कार्कीले नेपाली कांग्रेस जनताको पार्टी भएकाले कुनै अन्योलमा नपरी जनताको हकहित र मुलुकको समृद्धिका लागि काम गर्ने बताए ।
उनले सुनसरीको बराहक्षेत्र नगरपालिका वडा नम्बर ७ मा आयोजित कांग्रेसको विरोध सभालाई सम्वोधन गर्दै अदालतले दिने निर्णयको प्रतिक्षामा पार्टी रहेको र जनताको हकहितका लागि हुने जुनसुकै कदमका लागि पछि नपर्ने बताए ।
कार्कीले देश र जनता दुबैलाई नोक्सानी हुनेगरी वर्तमान सरकारले संसद् सवघटन गरेकोले त्यसको बिरुद्ध आफूहरु लागि परेको र भोली चुनावको अवस्था आए त्यसमा कांग्रेसलाई सहयोग गर्न अपिल गरें । संघीयता, लोकतन्त्र र सवैधानिक “कु” को बिरुद्ध नेपाली कांग्रेस सदैव राम्रोको समर्थन र नराम्रोको विरोध गर्ने पक्षमा रहेको उनले बताए ।
अहिलेको अवस्थामा कोहीकसैलाई अन्योल र अराजकतामा नपरी सुख शान्तिको जनताको अभिलाषालाई परिपूर्ति गर्नलाई कांग्रेस लागि परेको बताए । उनले केही क्रियाप्रतिक्रियावादी शक्तिहरुले देश अन्योलतातर्फ जाओस् भनेर चाहिराखेकाले त्यस्तो नहुनमा विश्वास दिलाए । उनले आफू सुनसरी क्षेत्र नम्बर ४ को पूर्व सांसद समेत भएकाले यहाँका जनताको माझमा रहेर जनमत र अभिमत अनुसार काम गर्ने प्रतिवद्धता जनाए ।
कार्यक्रमा कोशी गाउँपालिकाका अध्यक्ष ऐयुब अन्सारी, नेपाली कांग्रेसका नेता उपेन्द्र कटुवाल, मुस्लिम संघ प्रदेश १ का अध्यक्ष डा.इसराईल मंसुरी, नेता सदानन्द मण्डल, युवा नेता सुनोज निरौला लगायतको नेता तथा कार्यकर्ताहरुको उपस्थिती रहेको थियो ।
यसैबीच बराहक्षेत्र नगरपालिका वडा नम्बर ७ का नेपाल कम्यूनिष्ट पार्टी परित्याग गरी ४५ जनाले नेपाली कांग्रेस प्रवेश गरेका छन् । कुलबहादुर तामाङ्ग सहित ४५ जना एकैसाथ नेपाली कांग्रेस पार्टी प्रवेश गरेको हुन् । नवप्रवेशीहरुलाई कार्कीले अविर र खादा लगाएर स्वागत गरेका थिए ।
