इटहरी : नेपाली गीत, संगीत र कलाको क्षेत्रमा ठूलो योगदान पुर्याएका इटहरीका राम धामीको सोमबार अन्त्येष्टि भएको छ । सोमबार बिहान इटहरी–२ मा रहेको संगीत साधना प्रतिष्ठानदेखि बुढीगंगा मुक्ति घाटसम्म शवयात्रा गरी उनको अन्त्येष्टि भएको हो ।
२०२३ वैशाख १६ गते इटहरी २ को थारु समुदायमा जन्मिएका राम धामीको आइतबार साँझ निधन भएको थियो ।
धामीको अन्तिम बिदाइमा आएका कलाकर्मी, साहित्यकर्मी तथा संगीतकर्मीहरुले उनको पार्थिब शरीरमा फूलमाला पहिर्याउँदै अन्तिम श्रदाञ्जली दिए ।
धामीको फोक्सोमा निमोनिया भएका कारण निधन भएको थियो । केही समयअगाडि कोरोना पीडित भएका धामी कोरोनामुक्त भए पनि उनको छातीमा निमोनिया भएकाले धरानस्थित वीपी कोइराला स्वास्थ्य विज्ञान प्रतिष्ठानको आइसियूमा उपचाररत थिए । उपचारकै क्रममा उनको आइतबार साँझ निधन भएको हो ।
नेपाल प्रज्ञा प्रतिष्ठानका पूर्वसदस्य उनको व्यक्तित्व शालीन र सरल स्वभावको थियो ।
संगीत सिकाएकै भरमा संकटकालको समयमा तीन महिनाभन्दा बढी समय जेलसमेत परेका उनमा सानैदेखि संगीतप्रतिको मोह थियो । एक सय बढी गीतमा संगीत भरसकेका धामीले दर्जनौँ गीतमा स्वर दिइसकेका छन् ।
तस्बिर : नवीन गड्तौला
