हरिनगरा । सुनसरीको हरिनगर गाउँपालिकाले सातौँ गाउँसभा बैठक मंगलबारबाट सुरु गरेको छ ।
हरिनगराको बासुकीनाथ मन्दिरमा हरिनगर गाउँपालिकाले सातौं गाउँसभा बैठक सुरु गरको हो ।
हरिनगर गाउँपालिकाका अध्यक्ष गफार अन्सारी मियाँको अध्यक्षतामा मंगलबार सातौं गाउँसभा बैठक सुरु भएको पालिकाले जनाएको छ । पहिलो दिन बैठकको औपचारिक उद्घाटन गरेर पालिकाका वडाध्यक्ष र सदस्यहरुले शुभकामना मन्तव्य व्यक्त गरेका छन् ।
हरिनगरा गाउँपालिकाले छेठौं गाउँसभा गरेको हुनाले विकास निर्माण लगायतका विभिन्न शीर्षकहरुमा बजेट परिमार्जन गर्ने, थप योजना पेश गर्ने, समस्याहरुको पहिचान गरी थप योजना बनाई गाउँसभा बैठकबाट पारित गर्ने उद्देश्य रहेको छ ।
गाउँपालिकाकी उपाध्यक्ष रिमझिमकुमारी भगतले दुईवटा विधेयक प्रस्तुत गरेर पालिकाका अध्यक्ष अन्सारीलाई हस्तान्तरण गरेकी थिइन् ।
गाउँसभाको उद्घाटन सत्रमा वडा सदस्यहरु अताबुल अन्सारी, राजेश पाल, सावित्री मलाहा, दाबुद अन्सारी र कार्यपालिका सदस्य सुशीलकुमार ठाकुरले पालिकाले सुरु गरेको योजनाहरुलाई समयमै कार्यान्वयन र अनुगमनलाई प्रभावकारी बनाउनुपर्ने जोड दिँदै सफलताको शुभकामना व्यक्त गरेका थिए ।
बैठकमा हरिनगर गाउँपालिका वडा नम्बर ३ का वडाध्यक्ष अरविन्दकुमार मेहता, ४ नम्बरका वडाध्यक्ष सुदीलाल मेहता र ७ नम्बरका वडाध्यक्ष नसिर खाँले पालिकामा जनताले भोगेको सास्ती, सामाजिक सुरक्षा भत्ता लिन जाँदा बैंकको लापरवाही, ठेकेदारको लापरवाही, समयमै योजनाको कार्वान्वयन र पालिकाभित्र रहेको विषयगत शाखाहरुको कमी कमजोरीहरुलाई औंल्याउँदै आउने दिनमा सुधार गरी जनतालाई छिटो छरितो सेवा प्रवाह गर्न सातौं गाउँसभा बैठकको उद्घाटन सत्रमा आवाज उठाएका थिए ।
हरिनगर गाउँपालिकाका अध्यक्ष गफार अन्सारी मियाँले सातौं गाउँसभा बैठकले पालिकाले सुरु गरेको कामलाई पूरा गर्ने, योजनाहरुलाई थप प्रभावकारी बनाई कार्यान्वयन गर्ने र थप योजना र बजेटको विषयमा सभाले सर्वसम्मतबाट पारित हुने विश्वास व्यक्त गरेका छन् ।
उनले पालिकामा जटिल समस्याहरुलाई पहिचान गरी छुटेका योजना वा थप्नुपर्ने बजेटमा ध्यान दिई कार्ययोजना र बजेट बनाई यसै सभाबाट पारित गर्नका लागि सबैलाई अनुरोधसमेत गरेका थिए ।
सातौं गाउँसभा बैठकमा हरिनगर गाउँपालिकाका प्रमुख प्रशासकीय अधिकृत भक्तबहादुर खड्का, सबै वडाका वडाध्यक्ष, सदस्य, सचिव, कार्यपालिका सदस्य र पालिकाका कर्मचारीहरु लगायतको सहभागितामा पहिलो दिन बैठक समापन भएको थियो ।
