इनरुवा । नेपाल कम्यूनिष्ट पार्टी (नेकपा)का केन्द्रीय सदस्य तथा प्रदेश १ का आन्तरिक मामिला मन्त्री हिक्मत कार्कीले समयमा निर्वाचन हुने बताउनुभएको छ ।
बुधबार सुनसरीको धरानमा राष्ट्रिय युवा संघ नेपाल सुनसरीले आयोजना गरेको बृहत भेलालाई सम्बोधन गर्नुहुदै कार्कीले देशको विकास, समृद्धि र ताजा जनादेशका लागि निर्वाचन उपयुक्त माध्यम भएकाले समयमा नै निर्वाचन हुने बताउनुभएको हो ।
मन्त्री कार्कीले पार्टीका नेता पुष्पकमल दाहाल प्रचण्ड र माधव नेपाल सहितका कारणले देशको विकास र समृद्धिको बाटोमा अवरोध हुने भएकाले संसद विघटन गरेर ताजा जनादेशका लागि चिर्वाचनको घोषणा गरिएको बताउनुभयो ।
वहाँले संविधानको व्यवस्था अनुसार नै संसद विघटन र नयाँ जनादेशका लागि मध्यावती निर्वाचन गर्ने कार्यमा सरकार लागेको बताउनुभयो । वहाँले प्रचण्ड, नेपाल र झलनाथ खनाल सहितका नेताहरुलाई सच्चिएर आउन समेत मन्त्री कार्कीले अपिल गर्नुभयो ।
कार्यक्रममा नेकपाका नेता महेश बस्नेतले निर्वाचनको तयारीमा जुट्न कार्यकर्तालाई आव्हान गर्नुभयो ।
भेलालाई सम्बोधन गर्दै नेकपाका केन्द्रीय सदस्य समेत रहनुभएका बस्नेतले प्रधानमन्त्री केपी शर्मा ओलीको एजेन्डा बोकेर निर्वाचनमा लागेमा जित निश्चित हुने दाबी गर्नुभयो ।
अन्य दलहरू सरकारविरुद्ध सडक प्रदर्शन गरि रहेपनि उनीहरू पनि भित्री रुपमा निर्वाचनको तयारीमा जुटिसकेको उहाँको भनाई थियो । त्यसैले ‘अब हामी पनि निर्वाचनको तयारीमा लाग्नुपर्छ, उहाँले भन्नुभयो ।’
माधवकुमार नेपाल र झलनाथ खनालले कम्युनिस्ट आन्दोलनको इतिहास बिर्से जस्तो भएको बताउँदै भन्नुभयो ‘नबिर्सिनुहोस् कमरेडहरू, एमाले पार्टीकै चुनाव चिन्ह ‘सूर्य’ हो, सूर्य चिन्ह हाम्रै हो, यसको लागि हामी जस्तो सुकै बलिदान दिन तयार छौँ ।’ अहिले सूर्य चिन्हमा पुष्पकमल दाहाल प्रचण्डले कुदृष्टि लगाइरहेको उहाँको आरोप थियो ।
मुलुकको सार्वभौमिकता, राष्ट्रिय अखण्डता, सुशासन, भ्रष्टाचारमुक्त, विकास निर्माणमा लागेका प्रधानमन्त्री ओली मुलुकका राजनेता भएको बताउँदै उहाँले भन्नुभयो, ‘कुचो लिएर झाडी सफा गर्न जाँदा झारीमा बसेका बारुला र अरिङ्गालले टोक्न खोजे, प्रधानमन्त्री ज्यु अब हातमा आगो लिएर अघि बढ्नुहोस् झारीमा बसेका त्यस्ता बारुला र अरिङ्गाल जलाएर अघि बढ्नुहोस्, तपाईँको साथमा हामी छौँ ।’
कार्यक्रममा केन्द्रिय सदस्य खेमराज पोखरेलले समेत अहिले कम्युनिस्ट आन्दोलनलाई कमजोर बनाउने खेलमा प्रचण्ड र नेपाल समूहका नेताहरु लागि परेको आरोप लगाउनुभयो । पोखरेलले भन्नुभयो, ‘लोकतन्त्रिक पद्धति विपरीत सरकारविरुद्ध आन्दोलनको नाममा सीमा नाघ्ने काम गरिँदैछ, कालोझण्डा देखाउने, निषेध तथा अवरोध गर्ने हर्कत बढ्दै गएकोले त्यसको प्रतिकारमा युवा सङ्घका कार्यकर्ता सडकमा उत्रिन नपरोस् ।’ जनताको चाहना बमोजिम राष्ट्र निर्माण र एकताको पक्षमा प्रधानमन्त्री ओली रहेकाले उहाँलाई आफुहरुले साथ दिएको बताउनुभयो ।
भेलामा नेकपाका केन्द्रीय सदस्य भगवती चौधरी, नेकपाका युवा नेता महेश बस्नेत, केन्द्रिय सदस्य मुरारी सुवेदी, मोतिराज सुनुवार, राष्टिय युवा संघका देवानन्द मेहता सहित दर्जन बढि केन्द्रीय सदस्यको उपस्थिती रहेको थियो ।
धरानका विभिन्न वडाबाट आएका युवाहरु धरान–१२ स्थित पब्लिक स्कुलमा भेला भएर ¥यालि सहित छाताचोक, भानुचोक, पानवारी वस स्टेण्ड हुँदै भेला स्थल चुम्लुङ भवनमा पुगेको थियो । भेलाको अध्यक्षता जिल्ला सह संयोजक अरुण गुरुङले गर्नु भएको थियो ।
