टोमराज मेहता
इनरुवा । नेपाली कांग्रेसका केन्द्रीय सदस्य तथा निवर्तमान सांसद ज्ञानेन्द्रबहादुर कार्कीले राजनीतिबाटै जनताको सेवा गर्दै आएको बताएका छन् । सुनसरी निर्वाचन क्षेत्र नम्बर–४ को भोक्राहा नरसिंह गाउँपालिकामा आयोजित कार्यकर्ता भेटघाट कार्यक्रमलाई सम्वोधन गर्दै कार्कीले सो कुरा बताएका हुन् ।
निवर्तमान सांसद कार्कीले जनताको समस्या वा गुनासो सुन्दै यस क्षेत्रको विकास गर्न आवश्यक रहेको थप्दै साढे तीन वर्षको अवधिमा झण्डै एक वर्ष कोरोनाको महामारी बितेको र दुई वर्षमा आफूले ४ नम्बर क्षेत्रका ठूला–ठूला योजना पारेको दाबी गर्दै उनले संसद कोषको बजेट पनि सुनसरीको विभिन्न क्षेत्रमा लगानीसमेत गरेको बताए ।
‘जनताको सेवा गर्नु धर्म हो,’ उनले भने, ‘राजनीतिबाटै जनताको सेवा गरिरहेको छु । जनताको भावनाअनुसार यस क्षेत्रमा कार्य गरेको र बाँकी रहेको कामलाई पनि पूरा गर्नेछु ।’
बहुभाषिक, बहुजातीय, बहुधार्मिक र बहुसांस्कृतिक देश नेपाल भएको बताउँदै आफूले यस क्षेत्रबाट निर्वाचित भएपश्चात् मठमन्दिर, बाटोघाटो, गुम्बा, श्रीलंकाटप्पुमा बिजुली पुर्याएको भन्दै उनले सबै क्षेत्रलाई समेटेर सांसद कोषबाट रकम विनियोजन गरेर विकासको कामलाई प्राथमिकता राखेको बताए ।
कार्कीले आइतबार र सोमबार गरी भोक्राहा नरसिंह गाउँपालिकाको आठवटै वडामा गई प्रत्यक्ष जनतासँग भेटघाट गरी स्थानीय जनताको राय संकलन गरेका छन् ।
सो क्षेत्रमा आयोजित विभिन्न कार्यक्रममा काकीले आफ्नो निर्वाचन क्षेत्रमा काम गर्दै जाँदा कमीकमजोरी भए आफूलाई समयमै सुझाव दिन सर्वसाधारणलाई अनुरोध गर्दै उनले लोकतन्त्रमा विश्वास गर्ने र राजनीतिबाट जनताको सेवा गर्नु प्रमुख उद्देश्य भएको बताए ।
विकासविनाको खोक्रो नारा दिने कम्युनिस्टहरु सस्तो लोकप्रियता कमाउन थालेको वर्तमान अवस्थामा उनीहरुको चरित्र बुझी तमाम् जनता समयमै सचेत हुनुपर्ने आवश्यक रहेको बताए ।
निस्वार्थ भावनाले जनताको सेवामा समर्पित रहेकोले अबको दिनमा पनि जनताको सेवामा इमान्दार भएर लाग्ने समेत बताउँदै जनताको समस्यालाई पहिलो प्राथमिकतामा राखेर समाधान गर्ने प्रयास गरेको बताए । जनताको इच्छाआंकक्षा, अभिलाषा अनुसार अगामि दिनमा पनि काम गर्ने प्रतिवद्धता उनले ब्यक्त गरें ।
कार्यक्रममा नेपाली कांग्रेस भोक्राहा नरसिंहका सभापति युवराज दाहाल, मुस्लिम संघ १ नम्बर प्रदेशका अध्यक्ष हाजी इसराइल मन्सुरी, नेपाली कांग्रेसका नेता हारुन अन्सारी, आलम अन्सारी, ४ नम्बरका क्षेत्रीय सचिव राजेन्द्रप्रसाद मेहतालगायतको उपस्थिति रहेको थियो ।
