हरिनगर । सुनसरीको हरिनगर गाउँपालिकामा अपाङ्गता भएका ब्यक्तिहरुलाई उपचार सेवा दिने गरी अपाङ्गता स्वास्थ्य परीक्षण शिविर सुरु भएको छ ।
हरिनगर गाउँपालिकाले अपाङ्गता भएकाहरुलाई उपचार सहित स्वास्थ्य सेवा प्रवाह गर्ने र अब जन्मिने बच्चामा अपाङ्गता शून्य पार्ने उद्धेश्यका साथ चार दिने शिविर सुरु गरेको हो ।
गाउँपालिकाले प्रदेश १ सामाजिक विकास मन्त्रालय र करुण फाउन्डेशनको सहकार्यमा शिविर सुरु गरेको हो । शिविरको उद्घाटन सत्रमा हरिनगर–१ र २ का ५१ म्हिला र ५८ पुरुष गरी एक सय नौ जनालाई सेवा प्रवाह गरेको गाउँपालिकाले जनाएको छ ।
शिविरको शुभारम्भ गर्दै गाउँपालिका अध्यक्ष गफार अन्सारीले गाउँपालिकामा रहेका अपाङ्गता भएका ब्यक्तिहरुलाई सम्मान सहित बाँच्नका लागि वातावरण निर्माण गरेको र आवश्यक पर्नेलाई स्वास्थ्य परीक्षणदेखी उपचारसम्मको कार्य गर्न आफूलागि परेको बताए ।
उनले प्रदेश सरकारको सहयोगमा पालिकाभित्र रहेका अपाङ्गता भएका ब्यक्तिहरुको पहिचान गरी तथ्याङ्क संकलन भएको र उनीहरुलाई आवश्यक पर्ने साहक सामग्री उपचार सहितको प्रवन्ध गर्ने कार्य थालनी गरेको बताए ।
अन्सारीले गाउँपालिकामा अब बच्चा पेटमै बसेपछि बिभिन्न खोप सहित सेवा गर्भवति महिलालाई प्रवाह गर्ने र विवाह गरेका दम्पतिलाई शुभकामना कार्ड र गर्भ बसेपछि मोवाइलमै सूचना सहितको जानकारी प्रवाह गर्नेगरी कार्यक्रम ल्याएको बताए ।
कार्यक्रममा हरिनगर गाउँपालिकाकी उपाध्यक्ष रिमझिम कुमारी भगत, प्रमुख प्रशासकीय अधिकृत भत्तबहादुर खड्का, १ नम्बरका वडाध्यक्ष लतिफ मियाँ अन्सारी, २ का वडाध्यक्ष युनुस मियाँ लगायतको सरोकारवालाको सहभागिता थियो भने आज दोश्रो दिन हरिनगर–६ र ७ को बसन्तपुर तथा घुस्कीमा स्वास्थ्य परीक्षण शिविर रहेको आयोजकले जनाएको छ ।
