इनरुवा । इनरुवा नगरपालिकाका प्रमुख राजन मेहताले इनरुवा क्षेत्रमा शैक्षिक क्षेत्रको नयाँ परिवर्तन अनुभूत हुने गरी काम थालेको बताएका छन् ।
शनिबार इनरुवामा स्थानीय विद्यार्थीहरुको मेयरसँग अन्तर्क्रिया कार्यक्रममा सम्बोधन गर्दै प्रमुख मेहताले विज्ञानशास्त्रमा कक्षा १२ सम्म पठनपाठनका लागि आफू प्रयासरत रहेको बताएका हुन् ।
इनरुवा नगर क्षेत्रमा विद्यार्थी ओसार्नका लागि इनरुवा बाहिरका २२ वटा बस आइरहेको तथ्यलाई मध्यनजर गरी इनरुवामै विज्ञानशास्त्रको पठनपाठनका लागि अगामी शैक्षिक सत्रबाट पढाइ हुने गरी कक्षा सञ्चालनको तयारीमा रहेको बताएका छन् ।
प्रमुख मेहताले इनरुवाका विद्यार्थीहरु नजिकै विज्ञान र प्राविधिक क्याम्पसहरु नहुँदा धरान, इटहरी, विराटनगर र काठमाडौँ जान बाध्य भएकाले उनीहरुलाई आफ्नै घरमा खाएर उच्च शिक्षा लिनका लागि सहज हुने गरी शिक्षामा परिर्वतनको प्रयासमा लागेको बताए ।
विद्यार्थीहरुसँग पहिलो पटक साक्षात्कार भएका प्रमुख मेहताले विद्यार्थीहरुको समस्या, सवाल, चाहना र आवश्यकतालाई बुझ्नका लागि आफूले अन्तर्क्रिया कार्यक्रम राखेको बताउँदै शैक्षिक क्षेत्रमा केही परिर्वतन भए पनि चाहेजस्तो नभएकाले त्यसमा निरन्तर लागिपरेको दावी गरे । विद्यार्थीहरुका प्रश्नका जवाफ दिँदै मेहताले विज्ञानशास्त्रमा विद्यार्थीमैत्री पठनपाठन र वातावरणका लागि आफू लागिपरेको बताए ।
उनले आफ्नो कार्यकालमा धेरै काम गर्ने सोच राखेको भए पनि सीमित स्रोतसाधनका बीच काम गर्नुपर्दा केही समस्या रहेको सुनाउँदै आफूले सकेजति काम गर्ने प्रतिबद्धता जनाए । अबको क्याम्पस प्रविधियुक्त, विज्ञान प्रयोगशालाले भरिपूर्ण, आधुनिक पोशाक र विद्यार्थीमैत्री, भौतिक पूर्वाधारसमेत हुनुपर्ने भएकाले आफू त्यसका लागि क्रियाशील भएर लागेको सुनाए ।
उनले विद्यार्थीहरुको खेलकुदप्रतिको प्रश्नमाथि जवाफ दिँदै देशभरि खेलकुदको माध्यमबाट इनरुवाको पहिचान स्थापित गराएको दाबी गरेँ । विद्यार्थी विराट आचार्यले खेलकुदको आयोजना भए पनि खेलाडी उत्पादन किन नभएको ? खेलाडीलाई खेलकुद सामग्री किन नदिएकोेलगायतका प्रश्न राखेकोमा नगर प्रमुख मेहताले पहिचानका लागि खेलकुदले योगदान गरेको र खेलाडी उत्पादन गर्ने कामसमेत नगरपालिकाले गर्न लागेको जवाफ दिए ।
विद्यार्थी क्षितिजा निरौलाले इनरुवा–६ मा भएको विकास निर्माण काममा गुणस्तरहीन सामग्री प्रयोग भएको र निर्माण भएको छ महिना नपुग्दै भत्किएको प्रश्न राखेकोमा प्रमुख मेहताले त्यसको अनुगमन आजको भोलि नै गर्ने र बिग्रिएको पाइए निर्माण कम्पनीलाई नै मर्मत वा पुनःनिर्माण गर्न लगाउने प्रतिबद्धता जनाए ।
मेहताले इनरुवा–६ मधेसा क्षेत्रमा संघीय प्रदेशसहित ८० करोडको योजना रहेकाले सबैको निगरानी जरुरी रहेको बताए । विद्यार्थीले निःशुल्क शिक्षाका लागि पहल गर्नुपर्ने र छात्रवृत्तिमा सहयोग हुनुपर्ने सुझाव राखेकोमा प्रमुख मेहताले आफू इनरुवाको विद्यार्थी अध्ययनरत रहेको इनरुवा बाहिरका सबै क्याम्पससँग समन्वय, छलफल र प्रस्तावको तयारीमा रहेको बताउँदै प्रत्येक क्याम्पसलाई कम्तिमा दुईजना इनरुवाको विद्यार्थीलाई पूर्ण छात्रवृत्तिमा पढाउनुपर्ने प्रस्ताव राख्ने बताए ।
प्रमुख मेहताले नगरपालिका आफैँले सबैलाई शिक्षा दिन नसके पनि समन्वय भने गर्ने प्रतिबद्धता जनाए । उनले संघीय सरकारको शिक्षा कार्यविधि र नीति आएसँगै नगरपालिकाले समेत आफ्नो शिक्षा नीति सार्वजनिक गर्ने तयारीमा रहेको बताए ।
मेहताले आफूहरुको शिक्षा नीतिमा कक्षा–३ सम्म झोला र किताबविहीन पठनपाठनको तयारी गरेको सुनाए । कार्यक्रममा किशोर मेहता, दीपिका निरौला, सतिक्षा खड्कालगायतले प्रश्न गरेका थिए ।
कार्यक्रम इनरुवा इभेन्ट म्यानेजमेन्टको संयोजनमा भएको थियो भने सञ्चालन युवा अभियान्ता धीरज भट्टराईले गरेका थिए । कार्यक्रममा नगर क्षेत्रका विभिन्न तहमा अध्ययनरत दुई सयभन्दा बढी विद्यार्थीहरुको सहभागिता रहेको थियो ।
