इनरुवा । सुनसरीको भोक्राहा नरसिंहमा विभिन्न पार्टी परित्याग गरी नेपाली कांग्रेसमा प्रवेश गर्ने लहर बढेको छ । भोक्राहा नरसिंह गाउँपालिका–१ का विभिन्न पार्टी परित्याग गरी एकसाथ ५१ जना नेपाली कांग्रेस प्रवेश गरेका हुन् ।
नेपाली कांग्रेस क्षेत्र नम्बर ४ को क्षेत्रीय कार्यसमिति, नेपाली कांग्रेस भोक्राहा नरसिंह गाउँपालिकाको पहलमा विभिन्न पार्टी परित्याग गरी ५१ जना नेपाली कांग्रेसमा प्रवेश गरेको जनाएको छ ।
यसअघि पनि भोक्राहा नरसिंह गाउँपालिकामा विभिन्न पार्टी परित्याग गरी युवाहरू कांग्रेस प्रवेश गरेका थिए । संसद् विघटनपछि नेकपामा केपी शर्मा ओली र नेपाल–प्रचण्ड समूहमा विभाजन भएपछि कार्यकर्ता अन्योलमा परेपछि विकल्पका पार्टीका रूपमा नेपाली कांग्रेस रोजेका हुन् ।
भोक्राहा नरसिंह–१ मा पनि ५१ जना युवा प्रवेश गरेको कांग्रेसी नेताहरूको भनाइ छ । भोक्राहा नरसिंह–१ मा तत्कालीन एमालेबाट निर्वाचित वडाध्यक्ष भए पनि वडाका युवाहरूलाई नेपाली कांग्रेसका प्रवेश गराउन कांग्रेस नेता कार्यकर्ता सफल भएका छन् । निकै उत्साह र उमंगका साथ नवप्रवेशी कांग्रेस प्रवेश गरेका छन् ।
राप्रपा, नेकपा, जसपालगायतका पार्टी परित्याग गरी भोक्राहा नरसिंह–१ का युवा रुद्रनारायण साहसहित ५१ जना कांग्रेस प्रवेश गरेको नेपाली कांग्रेस क्षेत्र नम्बर–४ का सचिव राजेन्द्रप्रसाद मेहताले बताए । नवप्रवेशीहरूलाई निवर्तमान सांसद ज्ञानेन्द्रबहादुर कार्की, सीताराम मेहता, डाक्टर इसराइल मन्सुरीलगायतका नेताहरूले अबिर लगाएर स्वागत गरेका थिए ।
निवर्तमान सांसद ज्ञानेन्द्रबहादुर कार्कीले नेपाली कांग्रेस सबै जातजाति, भाषा, धर्म र संस्कृतिलाई सम्मान गर्ने पार्टी भएको बताए । पार्टी प्रवेश कार्यक्रमलाई सम्बोधन गर्दै मुलुककै साझा घरको रूपमा विकसित भएको नेपाली कांग्रेस नेपाली जनताको हितमा अगाडि बढने बताए ।
सबैको भावना र मर्मलाई कदर गर्दै कांग्रेसले नेपाली जनताको पक्षमा सदैव वकालत गरिरहेको र आगामी दिनमा पनि संविधानको रक्षा गर्ने जिम्मेवारी कांग्रेसको नै रहेको कार्कीले बताए ।
त्यसैगरी, अर्का निवर्तमान सांसद सीताराम मेहताले संसद् विघटनले देशमा ठूलो दुर्घटना निम्त्याउन खोजेको बताए । नेपाली कांग्रेसले देशलाई दुर्घटनाबाट बचाउन संघर्ष जारी राखेको उनको भनाइ थियो । प्रधानमन्त्रीलाई संसद् विघटनको कुनै व्यवस्था संविधानमा नभएको उनले बताए ।
त्यसैले संसद् विघटनजस्तो अलोकतान्त्रिक र असंवैधानिक कदमविरुद्ध नेपाली कांग्रेसले सबै निर्वाचन क्षेत्र, प्रदेश सभा र वडास्तरमा विरोध सभाबाट विरोध कार्यक्रम गरेको उनको भनाइ छ । संविधान रक्षा गर्नु कांग्रेसको एक मात्र दायित्व भएको उनले बताए ।
प्रदेश नम्बर–१ मुस्लिम संघका अध्यक्ष डाक्टर इसराइल मंसुरीले नवप्रवेशीहरूलाई योग्यता, क्षमता र दक्षताअनुसार नेपाली कांग्रेसमा अवसर दिनुपर्नेमा जोड दिए । भोक्राहा नरसिंहमा स्थानीय तहको निर्वाचनमा वडादेखि पालिका प्रमुखसम्मको पद गुमाएकाले अब हुने निर्वाचनमा कांग्रेसले लालकिल्ला गाड्ने दाबी गरे ।
पार्टीमा युवाहरूको प्रवेशको लहर दिनप्रतिदिन बढ्दै गएकाले आउँदो निर्वाचनमा यस क्षेत्रमा कांग्रेस बलियो हुने दाबी उनको छ ।
भोक्राहा नरसिंह–४ का वडाध्यक्ष तथा नेपाली कांग्रेसका युवा नेता हारुण अन्सारीको अध्यक्षतामा सम्पन्न भएको थियो ।
समापन सामारोहलाई सम्बोधन गर्दै अन्सारीले यस क्षेत्रमा एकजुट भएर कांग्रेसलाई बलियो बनाउनु आवश्यक रहेको बताए । अन्सारीले नवप्रवेशीहरूलाई कांग्रेसमा उचित स्थान दिने प्रतिबद्धतासमेत व्यक्त गरे ।
नेपाली कांग्रेस क्षेत्र नम्बर–४ का क्षेत्रीय सचिव राजेन्द्रप्रसाद मेहता र युवा नेता लक्ष्मण मेहताको सक्रियतामा ५१ जना कांग्रेस प्रवेश गरेका थिए ।
कार्यक्रममा सुनिल पोखरेल, सदानन्द मण्डल, ममता मेहता, शत्रुघन यादव, सुकदेव मेहता, चनरदेव मेहता, केदार पोखरेल, नारायणप्रसाद मेहतालगायतका नेता तथा कार्यकर्ताको सहभागिता थियो ।
