इनरुवा। प्रतिनिधिसभा विघटन भए पनि सांसदहरुले निर्वाचन क्षेत्र विकासका लागि पाएको स्थानीय पूर्वाधार साझेदारी कार्यक्रम कार्यान्वयनमै रहने भएको छ ।
सुनसरीको चारवटा निर्वाचन क्षेत्रमा संसद्हरुले पाएको कार्यक्रम चालु आर्थिक वर्षको बजेटमा आइसकेकाले कार्यान्वयन हुने भएको हो ।
संसद् विघटन भएपछि कार्यक्रम हुने–नहुने अन्योल बढेको बेला बजेट विनियोजन भइसकेकाले कार्यान्वयन हुने जिल्ला समन्वय समिति सुनसरीले जनाएको छ ।
समितिले मंसिर १५ गते संसद्हरुसँग बैठक बसेर आआफ्नो क्षेत्रमा विकास गर्ने योजनाहरु छनोट गरी कार्यान्वयन गर्नका लागि सम्बन्धित पालिकाहरुमा पठाएको निमित्त जिल्ला समन्वय अधिकारी रमेशप्रसाद भट्टराईले बताए ।
भट्टराईका अनुसार निलम्वित सांसद विजयकुमार गच्छदारबाहेक निर्वाचन क्षेत्र नम्बर १ बाट जयकुमार राईको ३० वटा योजना, निर्वाचन क्षेत्र नम्बर २ बाट सीताराम मेहताको ३३ वटा योजना र निर्वाचन क्षेत्र नम्बर ४ बाट ज्ञानेन्द्रबहादुर कार्कीको १६ वटासहित १२ करोडको योजना सञ्चालन भइरहेको छ ।
क्षेत्र नम्बर ४ का निवर्तमान सांसद कार्कीको क्षेत्रमा कोसी गाउँपालिकाका लागि दुई करोड ३७ लाख, भाृेक्राहा नरसिंह गाउँपालिकाका लागि ४० लाख, हरिनगर गाउँपालिकाका लागि ६० लाख, बराहक्षेत्र नगरपालिकाका लागि ७५ लाख र इनरुवा नगरपालिकाका लागि ४५ लाख विनियोजन भएको छ ।
सबै कार्यका लागि स्थानीय पालिकाले स्थानीय पूर्वाधार विकास साझेदारी कार्यक्रम सञ्चालन कार्यविधि २०७७ को नियम १८ को उपनियम ३ को योजना तथा कार्यक्रम सञ्चालन गर्ने भएको हो । सबै योजनाहरु १० लाखभन्दा माथिको रहेको भट्टराईले बताए ।
