गनेश कुमार यादव
इनरुवा। इनरुवा जेसीज २०२१ को अध्यक्षमा निर्वाचित संयम कोइरालाले बिहीबार एक समारोहबीच जिम्मेवारी पाएका छन् । इनरुवाको बसपार्कमा आयोजित ३७ औं पदस्थापना तथा पुरस्कार समारोहबीच उनलाई अध्यक्ष पदको जिम्मेवारी हस्तान्तरण गरिएको हो ।
सो अवसरमा अध्यक्ष कोइरालाको नेतृत्वमा १० जनाको कार्यसमिति समेत बिस्तार गरिएको छ । इनरुवा जेसीजको उपाध्यक्षहरु सत्यनारायण यादव, सञ्जय मेहता, स्वेता साह र साकार पोखरेल रहेका छन् भने कार्यकारी उपाध्यक्षहरुमा खेमराज थापा र मनोज निरौला रहेका छन् ।
यसैगरी महासचिवमा राकेश निरौला र कोषाध्यक्ष पुष्पा खरेल तथा कानुनी सल्लाहकारमा विकेश मेहता रहेका छन् । अरु बाँकी पदमा अध्यक्ष कोइरालाले पहिलो बैठकबाट मनोनित गर्ने बताएका छन् । इनरुवा जेसीजको ३७ औं पदस्थापना कार्यक्रमलाई सम्बोधन गर्दै कार्यक्रमका प्रमुख अतिथि नेपाल जेसीजका राष्ट्रिय अध्यक्ष अरुण खनालले इनरुवा जेसीज नेपालको उत्कृष्ट रहेको बताएका छन् ।
जेसीजले युवाहरुको नेतृत्व गर्ने साझा संस्था भएकाले अगामी दिनमा इनरुवा जेसीजले राष्ट्रिय अध्यक्ष पाउनुपर्ने जिकिर गरेका छन् । त्यसैगरी इनरुवा जेसीजका पूर्वअध्यक्ष तथा नेपाली कांग्रेस सुनसरीका सभापति राजीव कोइरालाले जेसीजले युवाहरुको नेतृत्व र व्यक्तित्व विकास गर्ने संस्था भएकाले यसमा लाग्न अनुरोध गरेका छन् ।
जेसीजले युवाहरुको क्षमता विकाससँगै नयाँ पुस्तालाई हस्तान्तरण गर्ने परिपार्टीको विकास गर्नुपर्नेमा जोड दिएका थिए । नयाँ पुस्ताका युवाहरुलाई प्रोत्साहन र अगाडि बढाउनुपर्ने र जेसीजमा लागेर परिमार्जन गरी व्यावहारिक जीवनमा परिवर्तन ल्याउन सक्ने साझा संस्था भएको हुँदा युवाहरुलाई बढी प्राथमिकतामा राख्नुपर्नेमा उनले जोड दिएका थिए ।
नेपाली कांग्रेस १ नम्बर प्रदेशका सचेतक केदार कार्कीले जेसीज गोल्डेन उमेरका लागि उपयुक्त भएको बताउँदै जेसीजले व्यक्तित्व विकाससँगै समाज रुपान्तरण गर्ने, समुन्नत समाज बनाउन सहयोग गर्ने बताएका छन् । इनरुवा जेसीजका पूर्वअध्यक्ष तथा इनरुवा नगरपालिकाका नगर प्रमुख राजन मेहताले युवाहरुले बढी चासो राखेर जेसीजमा लागेर नेतृत्व र व्यक्तित्वको विकास गरी राजनीतिमा आउन आग्रहसमेत गरेका छन् ।
उनले भने, ‘युवाहरु हावाहुरी बतास हो ।’ समयसँगै युवाहरुलाई अवसर दिए समुन्नत समाजसँगै रुपान्तरण गर्न अहम भूमिका खेल्ने उनले बताए । युवाहरुको उज्जव भविष्य राजनीतिमा भएकाले युवापुस्ताहरुले अहम भूमिका खेल्नुपर्नेमा जोड दिँदै जेसीजले नै नेतृत्व गर्न सिकाउने संस्था भएकाले आउने दिनमा २०२१ का अध्यक्ष संयम कोइराला इनरुवा नगरपालिकाको मेयर बन्न सक्ने क्षमतावान व्यक्तिले अवसर र चुनौतीलाई चिर्दै अगाडि बढनुपर्ने बताए ।
कार्यक्रममा इनरुवा जेसीजका पूर्वअध्यक्ष वीरेन्द्र साह, विनोद मिश्रा, सुनोज निरौला, धीरज भट्टराई, शिवनारायण यादल, महिचन्द्र साहलगायतको सहभागिता रहेको थियो । २०२० का अध्यक्ष चन्दन यादवले २०२१ का अध्यक्षलाई पद हस्तान्तरण गरेका थिए ।
