इनरुवा । इनरुवा नगरपालिकाका नगरप्रमुख राजन मेहताले जनताको चाहना नै आफ्नो चाहना रहेकाले जनताले गरेको निर्णयअनुसार बसपार्क निर्धारित स्थानमै सञ्चालनका लागि इनरुवा नगरपालिकाको सातौँ नगरसभाबाट सहमतिअनुसार अगाडि बढ्ने निर्णय भएको बताएका छन् ।
इनरुवा नगरपालिकाका मेयर मेहताले इनरुवा नगरपालिकाभित्रै प्रहरी प्रादेशिक अस्पताल बनाउनसमेत जोड दिएका छन् । इनरुवा नगरपालिकाको सातौँ नगरसभा कार्यक्रमलाई सम्बोधन गर्दै मेयर मेहताले प्रहरी प्रादेशिक अस्पताल नगुमाउनका लागि सबैलाई आग्रह गर्दै इनरुवामा नै बनाउन जोड दिएका हुन् ।
लामो समयको प्रयासपछि आएको सो योजना पनि इनरुवावासीका हितका निम्ति नै भएकाले त्यसतर्फ पनि गम्भीर भएर सोच्न सबैलाई उनले आग्रह गरेका छन् ।
इनरुवा–४ स्थित नयाँ बसपार्कमा प्रहरी प्रादेशिक अस्पताल सञ्चालनका बारेमा स्पष्ट पार्दै मेयर मेहताले बसपार्क सञ्चालन गर्न अनुरोध गरे पनि प्रादेशिक अस्पताल इनरुवाले पाएको हुँदा यसलाई अन्यत्र नसार्न नगरसभामा सबैलाई अनुरोध गरेका छन् ।
इनरुवाको कुन ठाउँ उपयुक्त हुन्छ रु ठाउँ छनौट गरी प्रहरी प्रादेशिक अस्पतालका लागि जग्गा छनौट गर्न पनि नगरसभाका सभासदहरुलाई मेयरले अनुरोध गरेका छन् ।
बसपार्क सञ्चालनको नाममा सस्तो लोकप्रियता कमाउन खोज्नेहरुलाई होसियार रहन आग्रह गर्दै उनले सातौं नगरसभामा बोल्दै केही व्यक्तिहरुको षडयन्त्रकारी भूमिकाले इनरुवाको राजनीतिकमा उथलपथल आएकोले त्यसो नगर्नका लागि समेत आग्रह गरेका छन् ।
मेयर मेहताले भने, ‘बसपार्क सञ्चालनको नाममा राजनीतिक गरेर तत्काल सस्तो लोकप्रियता मात्र कमाउँछन् । भविष्यको राजनीतिलाई हेरर पनि काम गर्नुपर्छ ।’ केही जनता नबुझ्ने भएकाले सबैले जनतालाई बुझाउन आवश्यक रहेको बताउँदै उनले नगरबासीलाई सही र सत्य बुझाउनका निम्ति सबै नेताहरुलाई आग्रह गरे ।
स्मार्ट सिटी योजनाअन्तर्गत मुलुकभर ६ वटा मात्र नगरपालिका परेकोमा एउटा इनरुवा नगरपालिका परेको हुँदा यस पालिकालाई स्मार्ट सिटी योजनालाई सफल बनाउन सबैको दायित्व भएको उनले बताए । इनरुवा नगरपालिकाले विभिन्न ३० वटा योजनाहरु मन्त्रालयहरुमा पेश गरेकोसमेत दावी गर्दै उनले शहरी विकासबाट दुई अर्ब रकमको बजेट दिने भएकाले सबै एकजुट भएर सल्लाह गरेर अगाडि बढ्नुपर्ने मेयर मेहताको कथन छ ।
इनरुवा बसपार्क सञ्चालनको विषयमा सातौं नगरसभाबाट बसपार्क सञ्चालन गर्ने विषयमा सहमति गर्दै थप निर्णयका लागि आवश्यक गतिविधि अगाडि बढाउने निर्णय गरेको छ ।
केही दिनयतादेखि बसपार्क सञ्चालन गर्नेुपर्ने माग राख्र्दै नगरक्षेत्रमा नारावाजी गर्दै जग्गादाताहरु, स्थानीय नागरिक समाज र युवाहरु आन्दोलित बनेपछि बुधबारको सातौँ नगरसभाबाट सर्वसम्मतरुपमा निर्धारित स्थानमा बसपार्क सञ्चालन गर्ने निर्णय बारेको विषयले प्रवेश पाएको हो ।
