काठमाडौं । नेपाली कांग्रेसका सभापति शेरबहादुर देउवाले आदिवासी जनजातिहरूलाई आफ्नो पक्षमा ल्याउनुपर्ने आवश्यकता रहेको बताएका छन्।
नेपाली कांग्रेस आदिवासी जनजाति केन्द्रीय विभाग, नेपाल आदिवासी जनजाति संघले बिहीबार पार्टी केन्द्रीय कार्यालयमा आयोजना गरेको ‘नेपाली कांग्रेस र आदिवासी जनजातिको सवाल विषयक प्रशिक्षण कार्यक्रम’ मा बोल्दै सभापति देउवाले आदिबासी, जनजाति तथा दलितहरुलाई आफ्नो पार्टीको पक्षमा ल्याउनुपर्ने आवश्यकता रहेको बताएका हुन्।
उनले नेपाली कांग्रेस पार्टीले आदिवासी, जनजाति, महिला, दलित लगायतका सबैलाई आरक्षणको व्यवस्था गरेकोले कांग्रेस मात्रै समावेशी पार्टी भएको पनि बताए। कांग्रेस समावेशी पार्टी भए पनि उल्टो प्रचार भएकाले उल्टो प्रचारलाई चिर्दै आफ्नो पक्षमा ल्याउनुपर्ने आवश्यकता रहेको उनको भनाइ छ।
उनले भोलि सरकार बनाउनुपर्ने अवस्थामा आदिवासी जनजातिको पनि साथ चाहिने उल्लेख गर्दै जनतालाई आफ्नो पक्षमा ल्याउन काम गर्न नेताहरूलाई निर्देशनसमेत दिए।
सभापति देउवाले संसद विघटनको मुद्दा अदालतमा विचाराधीन भएकाले यस बारेमा नेपाली कांग्रेसले बोल्न नमिल्ने बताए। चुनावबाट सरकार बनाउने राजनीतिक व्यवस्थामा पार्टीले सधैँ चुनावको लागि तयारी गरिरहनुपर्ने भन्दै उनले आगामी दिनमा आउनसक्ने संसद् पुनस्स्थापना अथवा चुनाव दुवैको तयारीमा रहन पनि निर्देशन दिए।
कार्यक्रममा बोल्दै नेपाली कांग्रेसका उपसभापति विमलेन्द्र निधिले प्रतिनिधिसभा विघटन असंवैधानिक भए पनि निर्वाचनलाई असंवैधानिक भन्न नमिल्ने बताए। प्रधानमन्त्री ओलीको असंवैधानिक कदमको उपचार प्रतिनिधिसभाको पुनस् प्राप्ति नै भएको भन्दै चुनाव वा पुनस्स्थापनाबाट नै संविधानलाई लिकमा ल्याउन सकिने बताए। प्रतिनिधिसभाको पुनस्स्थापना र निर्वाचन दुवै संवैधानिक बाटो भएको उनको भनाइ छ।
नेपाली कांग्रेसका सहमहामन्त्री प्रकाशशरण महतले कम्युनिष्टहरूले निर्वाचन जितेसम्म नेपालमा समृद्धि नआउने बताए। कम्युनिष्टले निर्वाचन जितेसम्म जातजाति तथा संस्कृतिको सशक्तीकरण पनि नहुने उनको भनाइ छ।
सहमहामन्त्री महतले नेपाली कांग्रेसले पार्टीलाई समावेशी बनाएको कुराको प्रचारलाई पनि मजबुद बनाउनुपर्ने बताए। नेपाली कांग्रेसले गरेको काम जनतामाझ पुर्याउन नसकेको उनको भनाइ छ।
