टोमराज मेहता
हरिनगर । सुनसरीको हरिनगर गाउँपालिका–६ को घुस्कीमा दुई दिने निःशुल्क स्वास्थ्य शिविर सुरु भएको छ । केन्द्रीय सशस्त्र प्रहरी परिवार महिला संघ तथा प्रदेश नम्बर १ सशस्त्र प्रहरी परिवार महिला संघको आयोजनामा दुई दिने निःशुल्क स्वास्थ्य शिविर घुस्कीमा सुरु भएको हो ।
सीमावर्ती क्षेत्रका जनताका लागि स्वास्थ्य क्षेत्रमा पुहँच पुर्याउनका लागि सशस्त्र प्रहरी बल नेपाल बिओपी घुस्कीका सशस्त्र प्रहरी निरीक्षक सन्तोष सुवेदीको नेतृत्वमा दुई दिने निःशुल्क स्वास्थ्य शिविर सञ्चालन भएको हो ।
हरिनगर–६ घुस्कीका निःशुल्क स्वास्थ्य शिविरको उद्घाटन गर्दै सशस्त्र प्रहरी परिवार महिला संघकी केन्द्रीय अध्यक्ष सरिता कँडेल खनालले पीडितहरुलाई राहत वितरण, निःशुल्क स्वास्थ्य शिविर, रक्तदान कार्यक्रम, पछाडि पारिएका गरिब तथा जेहन्दार विद्यार्थीहरुलाई छात्रवृत्तिलगायतको कार्यक्रमहरु गर्दै आएको बताइन् ।
सशस्त्र प्रहरी परिवार महिला संघकी केन्द्रीय सहसचिव प्राथना केसी थापाले मानव सेवाका लागि सशस्त्र प्रहरीका श्रीमतीहरुद्वारा गठन भएको महिला संघले विगत लामो समयदेखि सामाजिक कार्य गर्दै आएको मुनाफारहित संस्था भएको बताइन् ।
थापाले महिला संघले सीपमुलक तालिम, स्वास्थ्य शिविरको आयोजना, बृद्धा आश्रमलाई सहयोग, वीरगति प्राप्त अमर सशस्त्र प्रहरी तथा कर्तव्य पालना गर्ने सिलसिलामा ज्यान गुमाउने सशस्त्र प्रहरीका सन्तानहरुलाई छात्रवृत्ति, निजका परिवारलाई सीपमूलक तथा आयमूलक तालिम प्रदान र आर्थिक सहयोग प्रदान गर्दै आएकोसमेत बताइन् ।
सुनसरीका सशस्त्र प्रहरी उपरीक्षक माधवप्रसाद पौडेलले स्वागत मन्तव्य व्यक्त गर्दै भारतीय सीमावर्ती क्षेत्र घुस्कीका जनताको स्वास्थ्यमा पहुँच नपुगेका र स्वास्थ्य क्षेत्रमा सचेतना फैलाउनमा सशस्त्र प्रहरीको पनि योगदान भएकाले यस क्षेत्रमा निःशुल्क स्वास्थ्य शिविरको आयोजना गरेको बताए ।
यसैगरी हरिनगर गाउँपालिकाका अध्यक्ष गफार अन्सारीले तराईको दुर्गम क्षेत्रको रुपमा रहेको हरिनगर गाउँपालिकाको वडा नम्बर–६ घुस्कीलाई मुलुकभर चिनाउनका लागि यस क्षेत्रमा निःशुल्क स्वास्थ्य शिविरको आयोजना गरेको बताए । यस क्षेत्रको पहिचानका लागि आफूले घुस्कीमा नै निःशुल्क स्वास्थ्य शिविर राखेको र यसबाट लाभ लिनका लागि सबैलाई अनुरोध गरेका थिए ।
स्वास्थ्य शिविरमा सशस्त्र प्रहरीकै आँखाका डा. मीना कुँवर जोशी, गाइनोका डा. सौजन्य कर्माचार्य, फिजिसियन डा. रोशनकुमार झा, इएनटीका डा. सुभाष विक, मेडिकल अफिसर डा. बिगिसा बस्नेत, श्रीराम केसी र अर्जुनकुमार यादवले पाँच सय १४ जना सर्वसाधारणहरुको चेकजाँच गरी निःशुल्क औषधि समेत वितरण गरिएको थियो ।
कार्यक्रममा नेपाल एपिएफ अस्पताल बलम्बु, बिर्तामोड डाइग्नोस्टिक एन्ड पोलिक्लिनिक धरान, हरिनगर गाउँपालिका, बिपि कोइराला स्वास्थ्य विज्ञान प्रतिष्ठान धरान, घुस्की बजार व्यवस्थापन समिति हरिनगर, सुनसरी ओखती धरान र एनएमएचआरए विराटनगरले सहयोग गरेका छन् ।
कार्यक्रममा प्रदेश १ सशस्त्र प्रहरी परिवार महिला संघकी अध्यक्ष सम्झना राणा दाहाल, प्रदेश १ का बाहिनीपति सशस्त्र प्रहरी नायव महानिरीक्षक बंशीराज दाहाल, महिला संघकी केन्द्रिय सहकोषाध्यक्ष लक्ष्मी श्रेष्ठ पोखरेल, हरिनगर गाउँपालिकाका प्रमुख प्रशासकीय अधिकृत भक्त बहादुर खड्का, वडाध्यक्षहरु नसिर खाँ र इसराईल अन्सारी, घुस्की स्वास्थ्य प्रमुख रानी खातुन,लगायतको सरोकारवालाहरुको सहभागिता रहेको थियो ।
