इनरुवा । सुनसरी सदरमुकाम इनरुवाबाट तीन महिना अघि गठन भएको इनरुवा अस्पताल सुधार संघर्ष समिति सुनसरीले आफनो दोश्रो चरणको आन्दोलन कार्यक्रम अन्तरगत मैनवति जुलुस प्रदर्शन गरेको छ ।
समितिले अस्पतालदेखी प्रदेश सरकार हुँदै संघीय सरकारका स्वास्थ्य मन्त्रीलाई ज्ञापन पत्र र ध्यानाकर्षण पत्र बुझाएको महिनौ बित्दा समेत कुनै सुनवाई नभएको भन्दै थप आन्दोलनको कार्यक्रम घोषणा गरेको समितिले बिहिवार इनरुवामा दवाव रुवरुप मैनवति जुलुस प्रदर्शन गरेको हो ।
मैनवति जुलुस पछि आयोजित कोणसभामा समितिका सल्लाहकार भुवनेश्वर यादवले माग सुनवाई नभएसम्म दवाव कार्यक्रम जारी रहने बताए । यादवले जनताको स्वास्थ्यमाथि सरकारले खेलवाड गर्न नहुने भन्दै आफूहरुको माग सम्वोधन हुनुपर्ने बताए ।
त्यस्तै समितिका संयोजक दिलिपचन्द साहुुले आफूहरुको २५ बुँदे माग सरोकारवाला निकायले सुनवाई नगरेपछि मैनवति जुलुस निकाल्न बाध्य भएको बताए । उनले अन्धो सरकार र अस्पताल समितिलाई ध्यान दिनका लागि दवाव स्वरुप दिउँसो नै मैनवति जुलुस प्रदर्शन गरेको बताए ।
त्यस्तै युवा नेता धर्मवीर आर्यले आफूहरु सुनसरीबासीको स्वास्थ्य सुरक्षा र स्वास्थ्य उपचारका लागि इनरुवा अस्पताल नै सुधार गर्नुपर्ने माग सहित पुनः फागुन महिनाका लागि आन्दोलनका कार्यक्रम घोषणा गरेको बताए ।
